AMEA N.Tusi adına Şamaxı Astrofizika Rəsədxanası (ŞAR) ordumuza dəstək məqsədilə Azərbaycan Respublikasının Silahlı Qüvvələrinə Yardım Fonduna 8 min 300 manat ianə edib.

Rəsədxananın direktoru, AMEA-nın müxbir üzvü Namiq Cəlilov, ŞAR əməkdaşlarının könüllü müraciətlərini nəzərə alaraq, əməkhaqqıların müəyyən hissəsinin Koronavirusla Mübarizəyə Dəstək Fonduna köçürülməsi ilə bağlı əmr imzalayıb.

Qeyd edək ki, sentyabr ayının 27-də Ermənistan silahlı qüvvələri tərəfindən ordumuzun mövqeləri, o cümlədən cəbhəboyu ərazidə yerləşən Azərbaycan kəndləri intensiv artilleriya atəşinə tutulub. İşğalçı Ermənistanın təxribatı nəticəsində hərbi qulluqçularla yanaşı mülki vətəndaşlar arasında da itkilər olub. Buna cavab olaraq isə Azərbaycan Silahlı Qüvvələri, Ali Baş Komandan İlham Əliyevin əmrilə düşmənə qarşı bütün cəbhə boyunca genişmiqyaslı əks-hücum əməliyyatlarına başlayıb.

Qəhrəman Azərbaycan ordusunun uğurlu əkshəmləsi nəticəsində Ermənistan silahlı qüvvələrinin ön xətdə və dərinlikdə olan atəş məntəqələri məhv edilib, düşmən çoxsaylı itkilər verərək geri çəkilməyə vadar edilib ki, bununla da 30 ilə yaxın bir müddətdir ki, düşmən tapdağı altında olan tarixi Azərbaycan torpaqlarının bir hissəsi (Füzuli və Cəbralıy rayonlarının bir neçə kəndi, Cəbrayıl rayonun mərkəzi, Murov dağ silsiləsində Murov zirvəsi, Suqovuşan) işğaldan azad edilib. Hal-hazırda da döyüş əməliyyatları uğurla davam etidirilir.

Mövcud vəziyyətlə əlaqədar ölkəmizdə qismən səfərbərlik elan edilib. Azərbaycan xalqı öz tarixi torpaqları uğrunda VƏTƏN müharibəsinə qalxıb, o cümlədən rəsədxana əməkdaşlarından da ordu sıralarına qoşulanlar vardır.

AMEA N.Tusi adına Şamaxı Astrofizika Rəsədxanasının kollektivi olaraq, bu mübarizədə dövlətimizin, millətimizin və ordumuzun yanında olduğumuzu ən layiqli şəkildə göstərir və xalqımızı bu mövzuda həmrəy olmağa çağırırıq.

© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.