AMEA N.Tusi adına Şamaxı Astrofizika Rəsədxanasının 2 metrlik teleskopunda Gaia Science Alerts proqramı çərçivəsində aşkar edilmiş transient obyektlərin (Gaia20blb, Gaia20cxk, Gaia20cek, Gaia20bpl, Gaia20bor) spektral müşahidələri aparılmışdır (N.İsmayılov, X.Mikayılov, O.Xəlilov, İ.Ələkbərov, S.Alışov, S.Bağırlı).

Müşahidələrdə 2020-ci ildə zəif səma cisimlərinin spektral müşahidəsinin aparılması üçün teleskopun Kasseqren fokusunda yeni quraşdırılmış  UAGS + obyektiv Canon EF (f = 200 mm, f / 2) + işıqqəbuledici Andor (ikonL-936-BEX2-DD 2048x2048, px = 13,5 mkm) spektroqrafdan istifadə olunmuşdur.  Spektral diapazon 3750-7650 Å, spektral ayırdetmə 6 Å/pikseldir. Alınmış spektrlər emal edilmiş, müşahidə materialından alınan ilkin nəticələr Polşa və Litvadan olan həmkarlarla birgə Beynəlxalq Astronomiya İttifaqının (IAU) "The Astronomers Telegram" onlayn məlumat sitemində dərc edilmişdir.

Qeyd edək ki, bu layihə çərçivəsində son dövrlərdə tərəfimizdən alınan yeni məlumatlar həmin dövri nəşrin bir neçə nömrəsində dərc edilmişdir.

© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.