Martın 4-də, AMEA N.Tusi adına Şamaxı Astrofizika Rəsədxanasının Gənc Alim və Mütəxəssislər Şurasının növbəti astroseminarı keçirilib.
Seminara rəhbərlik edən a.f.d. Günel Bahəddinova seminarı giriş sözü ilə açaraq, tədbir iştirakçılarına məruzənin mövzusu haqqında məlumat verib.
Daha sonra Şamaxı Astrofizika Rəsədxanasının "Ulduz atmosferləri fizikası və maqnetizm" şöbəsinin kiçik elmi işçisi Aynurə Məsimova "HD 208501 (B8 Ib) ulduzu spektrində Hα və dublet natrium NaI xətlərinin tədqiqi" mövzusunda məruzə ilə çıxış edib.
Məruzəçi, ifratnəhəng ulduzlar və onların tipik nümayəndəsi olan HD 208501(B8 Ib) ifratnəhəng ulduzu haqqında ümumi məlumat verib. O, HD 208501(B8 Ib) ifratnəhəng ulduzunun 2013-2019-cu il tarixlərində AMEA N.Tusi adına Şamaxı Astrofizika Rəsədxanasının 2 metrlik teleskopunda alınmış spektrləri əsasında Hα və dublet NaI D xətləri profillərinin dəyişməsi və spektral parametrlərinin tədqiqinin nəticələrini şərh edib.
A.Məsimova seminarda qeyd edib ki, ulduzun spektrində Hα xəttinin udulma komponenti ilə dublet natrium NaI D xəttinin şüa sürəti və ekvivalent enin qiyməti zamandan asılı olaraq əks fazada dəyişməsi aşkarlanıb. Ehtimal olunur ki, bu dəyişmə ulduzun döyünməsi və ulduz ilə ulduzətrafı örtüyün qarşılıqlı təsiri nəticəsində baş verə bilər. Müşahidələrdən alınmış bu nəticələr sübut edir ki, HD208501 ulduzunun ətrafında müəyyən bucaq altında müşahidəçiyə tərəf yönəlmiş, fırlanan, qeyri-bircins sıxlığa malik diskəbənzər qaz örtüyü vardır.
Seminar iştirakçılarının böyük marağına səbəb olan məruzənin sonunda mövzu ətrafında geniş müzakirələr aparılıb, suallar cavablandırılıb.
© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.
