Fevral ayının 12-də, AMEA N.Tusi adına Şamaxı Astrofizika Rəsədxanasında (ŞAR) növbəti astroseminar keçirilib.

Seminarı ŞAR-ın “Qoşa ulduzlar və eruptiv proseslər” şöbəsinin müdiri, f-r.ü.f.d Bayram Rüstəmov açaraq, seminar haqqında tədbir iştirakçılarına məlumat verib.

Daha sonra rəsədxananın “Nəzəri Astrofizika və kosmologiya” şöbəsinin aparıcı elmi işçisi, f-r.ü.f.d Bala Əli Rəcəbov "Qravitasiyanın alternativ nəzəriyyələri və kosmologiya" mövzusunda məruzəsini təqdim edib.

Məruzəçi seminarda fəza-zaman metrikasının siqnaturasından və Riman-Riççi tenzorunun təyinindən asılı olaraq Enşteyn tənliklərinin hansı formalarda yazıldığı barədə məlumat verib. O, elementar zərrəciklərin (elektronun nümunəsində) daxilində elektrik yükünün paylanmasını izah etmək üçün Enşteynin ümumi nisbilik nəzəriyyəsinin tənliklərində dəyişikliklər etmək təklifinin nə üçün uğursuzluqla nəticələnməsi ilə bağlı izahat verib.

Seminarın əsas hissəsi qravitasiyanın aşağıdakı alternativ nəzəriyyələrinin panoram görünüşünə həsr olunub:

1. Eynşteyn-Kartan nəzəriyyəsi;

2. Veylin konform-invariant nəzəriyyəsi;

3. Brans-Dikke nəzəriyyəsi;

4. Kaluza-Kleyn nəzəriyyəsi. 

Kalibrləşmiş sahələr nəzəriyyəsinin qravitasiyaya tətbiqinin tarixi və aktual nümulərindən söhbət açılıb:

1. Utiyama nəzəriyyəsi;

2. Kibbl nəzəriyyəsi;

3. De Sitter simmmetriya qrupunun lokallaşdırılması.

Məruzə seminar iştirakçıları tərəfindən maraqla qarşılanıb. Məruzənin sonunda tədbir iştirakçılarını maraqlandıran suallar cavablandırılıb.

© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.