Fevral ayının 5-də AMEA Şamaxı Astrofizika Rəsədxanasında (ŞAR) "ASTROSEMİNAR"ın növbəti yığıncağı keçirilib.
Seminara rəhbərlik edən f.-r.ü.f.d., dos. Bayram Rüstəmov seminarı giriş sözü ilə açaraq, tədbir iştirakçılarına məruzənin mövzusu və məruzəçi haqqında məlumat verib.
Astronomiya həvəskarı, Ə.Əliyev adına Azərbaycan Dövlət həkimləri təkmilləşdirmə İnstitutunun oftalmologiya kafedrasının professoru, tibb elmləri doktoru, Rasim Hacıyev “Ay və digər Kainat obyektlərinin yaranması nəzəriyyəsinə bir baxış. Xaos nəzəriyyəsi”mövzusunda məruzə ilə çıxış edib.
Məruzəçi Ay və digər kosmik obyektlərin yaranması nəzəriyyəsi haqqında öz baxışı barədə məlumat verib. O, öz fərziyyəsinin eksperimental əsası kimi sabun qovuğunun yayılması zamanı yaranan strukturların, sürətli çəkiliş aparan fotokamerada alınan şəkillərinin, müxtəlif Kainat obyektlərinin kosmik missiyalarda alınmış foto şəkilləri ilə müqayisələrindən çoxsaylı nümunələr təqdim edib.
Sabun qovuqlarının açılması zamanı SİNESTİYA–ya bənzər fraktal quruluşlar yaranır. (Harvard astrofiziki Saymon Lok və Kaliforniya Universitetindən Sara Styuart belə hesab edirlər ki, nə vaxtsa bizim Yer planeti də SİNESTİYA-dan - nəhəng planet özəklərinin toqquşması nəticəsində yaranan qızmar yarım ərimiş daşlardan ibarət geniş strukturdan ibarət olub). Bununla belə bu fraktal strukturlar kosmik obyektlərin Habl teleskopunda çəkilmiş şəkillərinə çox oxşayır. Məruzəçi, Atomun, Kosmik obyektlərin və insan orqanlarının quruluşu arasındakı oxşarlığa aid nümunələr təqdim edib və onların Xaos qanununa tabe olması haqqında fikir irəli sürüb.
Yekunda, məruzəçi, peşəkar astronomları bu məsələləri ətraflı, riyazi əsaslandırmaqla tədqiq edib, Kainat obyektlərinin yaranması haqqında təklif olunan mexanizmin işləyə bilmək səviyyəsinin yoxlanmasına çağırıb.
Seminar iştirakçılarının böyük marağına səbəb olan məruzənin sonunda mövzu ətrafında geniş müzakirələr aparılıb, suallar cavablandırılıb.
© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.
