Yanvar ayının 29-da Bakı Dövlət Universitetində,  Astrofizika kafedrasının AMEA N.Tusi adına Şamaxı Astrofizika Rəsədxanası (ŞAR) ilə birgə növbəti "ASTROSEMİNAR"ı keçirilib.

F-r.ü.f.d. Bayram Rüstəmov seminarı giriş sözü ilə açaraq, tədbir iştirakçılarına məruzənin mövzusu və məruzəçi haqqında məlumat verib.

Sonra ŞAR-ın “Ulduz atmosferləri fizikası və maqnetizm” şöbəsinin müdiri, f-r.ü.f.d Canməmməd Rüstəmov “Massiv ulduzların təkamül xüsusiyyətləri” mövzusunda məruzə ilə çıxış edib.

Məruzəçi qeyd edib ki, ulduzların təkamülündə onların kütləsi aparıcı rol oynayır. Massiv ulduzların təkamül yolu az kütləli ulduzlarin təkamül yolundan kəskin fərqlənir. Belə ki, müasir astrofizikanın ən ekzotik obyektləri, neytron ulduzları və qara dəliklər massiv ulduzların təkamülünün son mərhələlərində əmələ gəlir. Canməmməd Rüstəmov bildirib ki, nəzəri mülahizələrə görə massiv ulduzların təkamülünün son mərhələsində kvark ulduzları da yaranmalıdır. Lakin indiyə kimi bu ulduzları aşkar etmək mümkün olmamışdır. Hal-hazırda massiv (kütləsi 140 Günəş kütləsindən çox) Volf-Raye tipli ulduzlarının aşkar edilməsi ulduzların mövcud daxili quruluş nəzəriyyəsi üçün xeyli çətinlik yaratmışdır. Müasir nəzəri tədqiatların nəticələrinə görə kütləsi Günəşin kütləsindən 120 dəfədən böyük olan ulduzun mövcudluğu mümkün olmamalı idi.

Seminarda massiv ulduzlarda kimyəvi təkamülün  də kiçik  kütləli ulduzlardan fərqli ssenari üzrə getdiyi diqqətə çatdırılıb. Son illər bəzi massiv ulduzlarda aşkar edilən kimyəvi anomallığı izah etmək nəzəri tədqiqatlarda  xeyli çətinliklərlə üzləşir..

Seminar iştirakçılarının böyük marağına səbəb olan məruzənin sonunda mövzu ətrafında geniş müzakirələr aparılıb, suallar cavablandırılıb.

© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.