Yanvar ayının 22-də AMEA Şamaxı Astrofizika Rəsədxanasında (ŞAR) növbəti astroseminar keçirilib.
Seminara rəhbərlik edən f.-r.ü.f.d Bayram Rüstəmov seminarı giriş sözü ilə açaraq, tədbir iştirakçılarına məruzənin mövzusu haqqında məlumat verib.
Sonra rəsədxananın “Qalaktikalar və ulduzəmələgəlmə prosesləri” şöbəsinin müdiri, professor Nəriman İsmayılov "GAIA OPTİKON proqramı çərçivəsində yerüstü müşahidələr və yeni beynəlxalq əməkdaşlıq imkanları" mövzusunda məruzəsini seminar iştirakçılarına təqdim edib.
Nəriman İsmayılov Gaia kosmik misiyası (Avropa Kosmik Agentliyi) çərçivəsində həyata keçirilən OPTİKON proyekti haqqında geniş məlumat verib. O, bildirib ki, OPTİKON hal-hazırda Gaia missiyasi çərçivəsində həyata keçirilən yerüstü kosmik teleskoplar şəbəkəsindən ibarətdir. Onun əsas misiyası Gaia kosmik peykinin müşahidələrində aşkar edilmiş bütün qeyri-adi xassəli tranzient obyektlərin yerüstü müşahidəsini həyata keçirməkdir. Belə obyektlər qeyd olunur, kataloqlaşdırılır və yerüstü teleskoplar tərəfindən müşahidə edilir. Beləliklə, yeni aşkar edilmiş kosmik obyekt haqqında maraqlı məlumatlar toplanır. Bunlar astrofizikanın ən müxtəlif sahələrini əhatə edən obyektlərdir (ifratyeni alışmaları, qravitasiya linzaları, cavan ulduzlar, rentgen mənbələri, kvazarlar və s.).
Məruzənin yekununda professor N.İsmayılov Şamaxı Astrofizika Rəsədxanasının da artıq bu proqrama qoşulması üçün OPTİKON rəhbərliyinin Avropadakı təşkilatından razılıq alındığını bildirib. O qeyd edib ki, yaxın gələcəkdə bu beynəlxalq proyektə ŞAR teleskopları da qoşulacaqdır.
Seminar iştirakçıları tərəfindən maraqla qarşılanan məruzənin sonunda mövzu ətrafında geniş müzakirələr aparılıb, suallar cavablandırılıb.
© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.
