AMEA N.Tusi adına Şamaxı Astrofizika Rəsədxanasının "İKT və Təşkilat" şöbəsinin müdiri, f-r.ü.f.d Kamal Hwseynovun anadan olmasının 65-ci ili tamam olub.
Kamal Mehrac oğlu Hüseynov 6 yanvar 1955-ci ildə Azərbaycan Respublikası, Siyəzən şəhərində anadan olmuş, 1972-ci ildə orta məktəbi bitirərək Azərbaycan Dövlət Universitetinin (indiki Bakı Dövlət Universiteti) mexanika-riyaziyyat fakültəsinə daxil olmuşdur. 1977-ci ildə universitet təhsilini başa vuraraq, həmin ildən 1980-ci ilədək Azərbaycan Respublikası Elmlər Akademiyasının “Kaspi” Elmi Mərkəzində mühəndis və kiçik elmi işçi vəzifələrində çalışmışdır.
1982-ci illərdə Elmlər Akademiyasının Təbii Ehtiyyatları Kosmik Tədqiqatları İnstitutunda elmi işçi olaraq işə başlamışdır. 1990-cı ildə SSRİ Elmlər Akademiyasının Yer Fizikası İnstitutunda “Günəş sisteminin kiçik cisimlərinin akkumulyasiyasının dinamik aspektləri” mövzusunda namizədlik dissertasiyası müdafiə edərək, fizika-riyaziyyat elmləri namizədi elmi dərəcəsini almışdır.
1992-ci ildə Təbii Ehtiyyatları Kosmik Tədqiqatları İnstitutunun baş elmi işçisi Kamal Hüseynov, çətin hərbi-siyasi dövrdən keçən Azərbaycanın müstəqilliyinin ilk vaxtlarında Azərbaycan Silahlı Qüvvələrində zabit olaraq xidmətə yollanmışdır. Qarabağ döyüşlərinin iştirakçısı olmuş Kamal Hüseynov, xidməti dövründə uzun müddət Hərbi Dənizçilik Məktəbində kafedra rəisi vəzifəsinə çalışmışdır. Orduda palkovnik rütbəsinədək yüksələn Kamal Hüseynov 2009-cu ildə ehtiyyata buraxılmışdır.
2009-2014-cü illərdə Hərbi Təyyarəçilik məktəbində professor vəzifəsində çalışan K.Hüseynov 2015-ci ildən etibarən Azərbaycan Milli Elmlər Akademiyası Nəsirəddin Tusi adına Şamaxı Astrofizika Rəsədxanasında “İKT və Təşkilat” şöbəsinin müdiri vəzifəsində çalışmağa başlamış və hal-hazırda da rəsədxanada elmi fəaliyyətini davam etdirir.
İlk dəfə olaraq, koaqulyasiya tənliyinin fərqli nüvələr üçün həllini tapan Kamal Hüseynovun astrofizika sahəsində ixtisaslaşmış xarici və yerli elmi jurnallarda 19 elmi məqaləsi çap olunmuşdur.
Əməkdaşımızı 65 illik yubileyi münasibətilə təbrik edir, ona möhkəm cansağlığı, elmi fəaliyyətində yeni nailiyyətlər, tükənməz yaradıcılıq enerjisi arzulayırıq!
© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.
