Dekabr ayının 26-da, AMEA N.Tusi adına Şamaxı Astrofizika Rəsədxanasında növbəti astroseminar keçirilib.
Seminarın rəhbəri, f-r.ü.f.d Bayram Rüstəmov seminarı giriş sözü ilə açaraq, tədbir iştirakçılarına məruzənin mövzusu haqqında ətraflı məlumat verib.
Daha sonra rəsədxananın “Nəzəri Astrofizika və kosmologiya” şöbəsinin aparıcı elmi işçisi, f.r.f.d Bala Əli Rəcəbov "Ümumi nisbilik nəzəriyyəsi və kosmologiya" mövzusunda məruzə ilə çıxış edib.
Seminarda A.Eynşteynin ümumi nisbilik nəzəriyyəsi (ÜNN), onun postulatları, əsas tənlikləri və yaranma tarixi barədə ətraflı məlumat verilib. Eynşteyn tənliklərinin xüsusiyyətləri, onların analitik həlləri və kosmoloji obyektlərə və bütövlükdə kosmoloji modellərə tətbiqləri işıqlandırılıb. ÜNN-nin klassik effektləri, yəni Merküri planetinin perigeliyasının əsrlik dövrü, Günəşin yaxınlığında müşahidə olunan ulduzların səmadakı görünən vəziyyətlərinin yerdəyişməsi, qravitasiya qırmızı sürüşməsi və radiosiqnalların qravitasiyanın təsiri ilə yubanması (Şapiro effekti) barədə söhbət açılıb. Eynşteyn nəzəriyyəsinin aktual nəticələri kimi qravitasiya dalğaları, qara dəliklər və onların problemləri ətraflı müzakirə olunub.
Məruzəçi seminarda əsas kosmoloji modellər: Eynşteyn, de Sitter, Fridman və Robertson-Uoker modelləri barədə danışıb. O, kosmoloji sinqulyarlıqlar, onların növləri, o cümlədən, Big Bang haqqında geniş məlumat verib. Fundamental problemlər sırasında qravitasiya sahəsinin kvantlanması, bu yolda yaranan konseptual çətinliklər və perspektivləri seminar iştirakçılarının diqqətinə çatdırıb, kvant mexanikası və kosmologiyanın sintezini xüsusi olaraq vurğulayıb.
Tədbir iştirakçıları tərəfindən maraqla qarşılanan məruzənin sonunda mövzu ətrafında diskusiyalar aparılıb, suallar cavablandırılıb.
© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.
