Dekabrın 12-də, AMEA N.Tusi adına Şamaxı Astrofizika Rəsədxanasının Gənc Alim və Mütəxəssislər Şurasının növbəti astroseminarı keçirilib.
Seminara rəhbərlik edən a.ü.f.d Günel Bahəddinova seminarı giriş sözü ilə açaraq, tədbir iştirakçılarına məruzənin mövzusu haqqında məlumat verib.
Daha sonra Şamaxı Astrofizika Rəsədxanasının "Kosmik plazma və Heliogeofiziki problemlər" şöbəsinin kiçik elmi işçisi Elista Bayramova “Rentgen və ultrabənövşəyi şüaların "Bioloji lövhə"də bakteriya populyasiyasına təsiri” mövzusunda məruzə ilə çıxış edib.
Məruzəçi insan organizmində "kulturasiya olunmayan" hüceyrələrin patogenlik qabiliyyətlərinin bərpası faktına əsaslanaraq, bioloji lövhələri "kulturasiya olunmayan" mikoorqanizmlərlə zəngin olan və müxtəlif mikoorqanizmləri infeksiya mənbəyi kimi nəzərdən keçirərkən, seçilmiş dozada rentgen ve ultrabənövşəyi şüaların təsiri altında bakterial “bioloji lövhə”nin hüceyrə populyasiyasındakı struktur dəyişiklikləri, patogenlərin “bioloji lövhə”dən ayrılmasının mümkün olduğunu bildirib. Bunun nəticəsində isə ekoloji-epidemioloji baxımdan infeksiyaların yaranması ehtimalı artır. O, qeyd edib ki, rentgen və ultrabənövşəyi şüaların təsiri ilə bağlı ayrılıqda və kombinə halda alınmış məlumatlar, Kosmosdan Yerə gələn şüalanma dozalarına uyğun daha çox tədqiqatların aparılmalı olduğunu göstərir.
Seminar iştirakçılarının böyük marağına səbəb olan məruzənin sonunda mövzu ətrafında geniş müzakirələr aparılıb, suallar cavablandırılıb.
© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.
