Vətəninə hədsiz məhəbbət, xalqının tarixinə, keçmişinə, mədəniyyətinə, milli-mənəvi dəyərlərinə böyük sevgi və sayğı nümunəsi olan ulu öndər Heydər Əliyev Azərbaycan dövlətçiliyinin elə bir zirvəsidir ki, bu zirvə xalqımızın tərəqqiyə gedən yolunu daim nurlandırır, dövlətimizin gələcəyinə işıq saçır. Bu gün, o dahi şəxsiyyətin vəfatından 16 il ötür. Bu münasibətlə, 11-12 dekabr 2019-cu il tarixlərində AMEA N.Tusi adına Şamaxı Astrofizika Rəsədxanasında ulu öndər Heydər Əliyevin xatirəsinə həsr olunmuş anım mərasimi keçirilib.
Ümummilli liderin əziz xatirəsinin bir dəqiqəlik sükutla yad edilməsi ilə başlanan tədbirlərdə dahi rəhbərin şərəfli həyat yolu və fəaliyyətilə əlaqədar fikirlər səsləndirilərək, Heydər Əliyevin Azərbaycana rəhbərlik etdiyi dövr ərzində daim cəmiyyətin tərəqqisi üçün çalışdığı və ölkəni zamanın ağır və sərt sınaqlarından çıxartdığı vurğulanıb.
Bildirilib ki, Heydər Əliyev Azərbaycan xalqının yaddaşında qurucu və xilaskar dövlət xadimi, milli lider və xalq məhəbbətini qazanan öndər kimi qalıb. Azərbaycan xalqının mənəvi, siyasi və ictimai həyatında, dövlət quruculuğunda misilsiz xidmətlər göstərib. Belə ki, hələ sovetlər birliyi dövründə Heydər Əliyev respublikanın rəhbəri kimi milli ruhun, milli özünüdərkin yüksəlişi, xalqın tarixi yaddaşının özünə qayıtması, müstəqil dövlətçilik ideyalarının gerçəkləşdirilməsi üçün əsaslı zəmin yaradıb.
Tarixi gerçəklik ondan ibarətdir ki, Azərbaycana rəhbərlik etdiyi ilk günlərdən etibarən mənsub olduğu xalqın tükənməz yaradıcılıq enerjisinin, milli müstəqillik duyğularının reallaşmasına çalışan ulu öndər Heydər Əliyev xalqımızı dünyanın ən inkişaf etmiş xalqları səviyyəsinə çıxarmaq, Azərbaycan mədəniyyətinin zənginliyini bütün dünyaya nümayiş etdirmək üçün əlindən gələni əsirgəməyib. Hal-hazırda da ulu öndərin miras qoyduğu siyasi kurs, onun layiqli davamçısı olan Prezident İlham Əliyev tərəfindən uğurla həyata keçirilir.
© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.
