01 dekabr 2019-cu il tarixində Azərbaycanda ilk dəfə olaraq, Bakı şəhəri üzrə ümumtəhsil məktəblərini əhatə edən “Məktəblilərarası Astronomiya Olimpiadası” keçirilib. IX-X sinif şagirdlərindən ibarət 150-yə yaxın məktəblinin qatıldığı olimpiadaya ev sahibliyini Bakı Dövlət Universiteti edib.

Azərbaycan Respublikası Təhsil Nazirliyinin "Təhsildə inkişaf və innovasiyalar üzrə III qrant müsabiqəsi" çərçivəsində, AMEA N.Tusi adına Şamaxı Astrofizika Rəsədxanası (ŞAR), Bakı Dövlət Universiteti (BDU), Respublika Uşaq Gənclər İnkişaf Mərkəzi və Tusi-Bohm Planetariumun birgə təşkilatçılığı ilə həyata keçirilən təşəbbüsün əsas məqsədi şagirdlər arasında astronomiya sahəsinə marağın artırılması, təhsil sistemində astronomiyanın geniş yerə sahib olması üçün cəmiyyətin bu sahəyə daha çox təşviq edilməsidir.

Olimpiadanın açılış mərasimində BDU-nun rektoru Elçin Babayev çıxış edərək məktəbliləri salamlayıb, öz bilik və bacarıqlarını nümayiş etdirməkdə onlara uğurlar arzulayıb.

Sonra ŞAR-ın direktoru, AMEA-nın müxbir üzvü Namiq Cəlilov Şamaxı Astrofizika Rəsədxanasının 60 illiyi və Bakı Dövlət Universitetinin 100 illiyinə təsadüf edən ilk Astronomiya üzrə olimpiadanın bundan sonra da davamlı olaraq keçirilməsinin əhəmiyyətini vurğulayıb. Çıxışının sonunda Namiq Cəlilov olimpiada qaliblərinə ŞAR-da ekskursiya təşkil ediləcəyini bildirib.

"Təhsildə inkişaf və innovasiyalar üzrə III qrant müsabiqəsi"nin qalibi Abdullah Bazarov olimpiadanın şərtləri, təqdim edilən suallar barədə ümumi məlumat verdikdən sonra “Kainatın yaradılması və təkamülü: zamana səyahət” adlı elmi-kütləvi film nümayiş olunub.