Noyabrın ayının 28-də, Bakı Dövlət Universitetində (BDU) AMEA N.Tusi adına Şamaxı Astrofizika Rəsədxanasının (ŞAR) növbəti astroseminarı keçirilib.
Astrofizika kafedrasının müdiri vəzifəsini icra edən f.r.e.n., dos. Kəmalə Alışeva seminarı acaraq bildirib ki, BDU-nun Astrofizika kafedrasının ŞAR-da olan filialının fəaliyyətinin stimullaşdırılması məqsədilə, Bakı Dövlət Universitetində ayda bir dəfə Rəsədxana ilə birgə astroseminar keçirilməsi nəzərdə tutulub. İlk seminarın Bakı Dövlət Universitetinin 100 illik yubileyi ərəfəsinə düşməsinin əlamətdar bir hadisə olduğunu vuruqlayaraq, o, iştirakçıları bu bayram münasibətilə təbrik edib.
Sonra məruzə üçün söz ŞAR-ın “Qoşa ulduzlar və eruptiv proseslər” şöbəsinin müdiri f.r.e.n., dos. Bayram Rüstəmova verilib. O, “Kiçik və orta kütləli cavan ulduzlarda ulduz küləyi” mövzusunda icmal məruzə ilə çıxış edib.
Məruzəçi “ulduz küləyi”nin yaranma səbəbləri, mühüm xüsusiyyətləri və Kainatın təkamülündə rolu haqqında seminar iştirakçılarına müfəssəl məlumat verdi, kiçik və orta kütləli cavan ulduzlarda ulduz küləyinin müşahidə göstəricilərinə aid geniş icmal təqdim edib.
Seminar iştirakçıları tərəfindən maraqla qarşılanan məruzənin sonunda mövzu ətrafında geniş müzakirələr aparılıb və suallar cavablandırılıb.
© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.
