Noyabr ayının 6-da, AMEA N.Tusi adına Şamaxı Astrofizika Rəsədxanasının Gənc Alim və Mütəxəssislər Şurasının ilk astroseminarı keçirilib.
Seminara rəhbərlik edən a.ü.f.d Günel Bahəddinova seminarı giriş sözü ilə açaraq, tədbir iştirakçılarına məruzənin mövzusu haqqında məlumat verib.
Daha sonra Şamaxı Astrofizika Rəsədxanasının "Ulduz atmosferləri fizikası və maqnetizm" şöbəsinin elmi işçisi Aynur Abdulkərimova “Elementar zərrəciklər və kosmologiyanın aktual problemləri” mövzusunda icmal xarakterli məruzə ilə çıxış edib.
Aynur Abdulkərimova seminarda elementar zərrəciklər fizikası ilə kosmologiyanın kəsişdiyi məqamlardan və həllini tapmayan bir sıra problemlərdən bəhs edib. İnteraktiv şəkildə keçən seminarda Böyük partlayışdan sonra Kainatın soyuması, kvark-qlüon epoxasından Kainatın hazırkı strukturuna qədər keçdiyi mərhələlər və hal-hazırda bu mövzu ilə bağlı fizikanın açıq qalmış məsələləri, Kainatın sonrakı taleyi müzakirə olunub.
Sonda mövzu ilə əlaqədar suallar cavablandırılıb.
© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.
