Noyabrın 6-da, AMEA N.Tusi adına Şamaxı Astrofizika Rəsədxanasında növbəti astroseminar keçirilib.

Şamaxı Astrofizika Rəsədxanasının "Qoşa ulduzlar və eruptiv proseslər" şöbəsinin müdiri, f-r.ü.f.d Bayram Rüstəmov seminarı açaraq, seminar haqda tədbir iştirakçılarına məlumat verib.

Daha sonra Şamaxı Astrofizika Rəsədxanasının "Planetlər və kiçik səma cismləri" şöbəsinin aparıcı elmi işçisi, f.-r.ü.f.d Dmitriy Şestopalov “(3200) FAETON asteroidinin səthinin polyarimetrik xüsusiyyətləri” mövzusunda məruzə ilə çıxış edib.

Məruzəçi potensial təhlükəli Featon 3200 (Phaeton) asteroidinin polyarimetrik xüsusiyyətlərindən, 2017-ci ildə bu asteroidin müşahidəsi üzrə beynəlxalq birliyin nəticələrinə əsasən tədqiq edilməsindən ətraflı danışıb. O, qeyd edib ki, tədqiqatın məqsədi Yaponiya Kosmik Agentliyinin 2020-ci ildə planlaşdırdığı kosmik missiyasını gözləmək mərhələsində, bu asteroidin səthinin fotometrik və struktur xüsusiyyətlərini təyin etməkdir.

Ay və böyük asteroidlərdən fərqli olaraq, Faetonun səthində hissəcik ölçüsü təxminən 10-50 mikron olan incə tərkibli bir regolit yoxdur. Əksinə, Featonun səthi orta hissəcik ölçüsü ən azı 300 mikron olan kiçik daşlarla örtülüdür.

Seminar iştirakçıları tərəfindən maraqla qarşılanan məruzənin sonunda mövzu ilə bağlı müzakirələr aparılıb, fərqli yanaşmalar qeyd edilib və suallar cavablandırılıb.

© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.