Kosmik hava durumu – Günəş fəallığı çox aşağı səviyyədə olmuşdur. Günəş diski ləkəsizdir. Koronoqraf görüntülərində Yerə doğru yönələn digər CME (Coronal Mass Ejections – Tac kütlə atılması) müşahidə olunmamışdır.

2 MeV-dən çox enerjili elektron seli hesabat dövrü ərzində yüksək səviyyədə olmuş, 27 oktyabr/19.00 UTC-də 36,223 pfu-ya bərabər maksimal qiymət almışdır. 10 MeV-dən çox enerjili proton seli bütün hesabat dövrü ərzində fon səviyyəsində stabil qalmışdır.

Hesabat dövründə Günəş küləyi parametrlərində ötən günlərə nisbətən zəifləmə müşahidə olunsa da, yenə də sürtətli külək rejiminə uyğun qiymətlər qeydə alınmışdır. Ümumi maqnit sahəsi 4 nT tərtibində olmuş, B_z komponenti isə 3 nT və -4 nT intervalında dəyişmişdir. Günəş küləyinin sürəti ortalama 600 km/san olmuş, 27 oktyabr/00.00 UTC-də isə 672 km/san olmaqla hesabat dövrü üçün pik həddinə çatmışdır.

Geomaqnit sahə, son 24 saat ərzində ümumən sakitdir (Kp=3, 4). 

Kosmik hava proqnozu – Proqnoz dövründə (28 - 30 oktyabr) Günəş fəallığı çox aşağı səviyyədə qalacaq.

2 MeV-dən çox enerjili elektron selinin proqnoz dövründə (28 - 30 oktyabr) yüksək səviyyədə qalacağı proqnozlaşdırılır. 10 MeV-dən çox enerjili proton selinin proqnoz dövründə (28 - 30 oktyabr) fon səviyyələrində davam etməsi gözlənilir.

Proqnoz dövründə (28 - 30 oktyabr) CH HSS (Coronal Hole High Speed Streams – Tac dəliyindən çıxan yüksək sürətli axınlar) effekti səbəbindən Günəş küləyi parametrlərinin cari rejimə, yəni sürətli külək rejiminə uyğun qalacağı proqnozlaşdırılır. Sonuncu proqnoz günü isə (30 oktyabr) CH HSS effektinin geoeffektivliyi səbəbindən parametrlərin yenidən güclənəcəyi gözlənilir.

Proqnoz dövründə (28 - 30 oktyabr) geomaqnit sahədə ümumən sakitlik (Kp=3, 4), lakin qısa fasilələrlə fəal şəraiti (Kp=4) müşahidə oluna bilər. Maqnit qasırğasının yaranması ehtimalı proqnoz dövründə 10%-dən aşağı qiymətləndirilir.

© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.