Oktyabrın 23-də AMEA N.Tusi adına Şamaxı Astrofizika Rəsədxanasında (ŞAR) növbəti astroseminar keçirilib.
Seminara rəhbərlik edən f.-r.ü.f.d Bayram Rüstəmov seminarı giriş sözü ilə açaraq, tədbir iştirakçılarına məruzənin mövzusu haqqında məlumat verib.
Sonra rəsədxananın “Qalaktikalar və ulduzəmələgəlmə prosesləri” şöbəsinin aparıcı elmi işçisi, f.-r.ü.f.d Nazim Hüseynov "Spektral tipini dəyişən fəal nüvəli qalaktikalar" mövzusunda məruzəsini seminar iştirakçılarına təqdim edib.
Məruzəçi işıqlığın ciddi dəyişməsi nəticəsində spektral tipini dəyişən fəal nüvəli qalaktikaların tədqiq edilməsinin, kompakt nüvənin həndəsi quruluşunu, fiziki təbiətini və fəal nüvənin təkamül prosesinin aşkarlanması baxımından mühüm əhəmiyyət kəsb etdiyini deyib. O bildirib ki, kompakt nüvəyə maddə axını zamanı baş verən fiziki proseslərin öyrənilməsi, nəzəri fizikanın, nəzəri astrofizikanın və həm də kosmologiyanın bir sıra problemlərinin həllində açar rolunu oynaya bilər.
Seminarın sonunda mövzu ətrafında geniş müzakirələr aparılıb, suallar cavablandırılıb.
© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.
