Çin Xalq Respublikasında yerləşən FAST (The Five hundred meter Aperture Spherical Telescope) teleskopu dünyanın ən böyük radioteleskopudur.
O, indiyədək dünyada ən böyük hesab edilən Puerto-Rikodakı Aresibo rəsədxanasının teleskopundan böyükdür. Onun hazırlanmasına 5 il və 1,15 milyard yuan (180 milyon dollar) sərf edilib. Diametri 500 metr olan FAST teleskopu 25 sentyabr 2016-cı ildə işə salınıb. Teleskop ÇXR-nın cənubundakı Quancou əyalətinin yüksək dağlıq ərazisində yerləşir.
Tam dolmuş aperturaya malik FAST teleskopunda aşağıdakı əsas elmi işlər aparılır:
1. Kainatdakı iri miqyaslı neytral hidrogen buludlarının tədqiqi;
2. Pulsarların, zəif qalaktikaların aşkar edilməsi və müşahidələri;
3. Ulduzlararası mühitdə molekulların aşkarlanması;
4. Reionizasiya dövrünə aid obyektlərin öyrənilməsi;
5. Ulduzlararası rabitə siqnallarının aşkarlanması;
Qeyd edək ki, FAST teleskopunun qurulmasında təbii karst çuxurundan istifadə edilib. Onun reflektoru xüsusi tordan asılmış 4450 ədəd qofra edilmiş alüminiumdan hazırlanıb. Reflektorun özü isə çevrilmiş kasa formasını almış geodezik qübbədən ibarətdir. Reflektorun hər paneli aktuatorlarla idarə edilir.
Mənbə: news.xinhuanet.com saytı
© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.
