Avqustun ayının 29-da AMEA N.Tusi adına Şamaxı Astrofizika Rəsədxanasında (ŞAR) növbəti astroseminar keçirilib.

Seminara rəhbərlik edən f.-r.ü.f.d Bayram Rüstəmov seminarı giriş sözü ilə açaraq, tədbir iştirakçılarına məruzənin mövzusu haqqında məlumat verib.

Sonra rəsədxananın “Ulduz atmosferləri fizikası və maqnetizm” şöbəsinin böyük elmi işçisi, f.-r.ü.f.d Zahir Səmədov "HD 207260 (A2Ia) ifratnəhəng ulduzunun atmosferinin tədqiqi" (Z.A.Səmədov, Ə.M.Xəlilov, G.M.Hacıyeva, S.Ş.Rəcəbova, S.Ş.Quliyeva) mövzusunda məruzəsini seminar iştirakçılarına təqdim edib.

Məruzəçi bildirib ki, ŞAR-ın 2 metrlik teleskopunun Kasseqren fokusunda HD207260(A2Ia) ulduzunun yüksək ayırdetməli (R=56000) CCD spektrləri alınıb, spektrlər işlənib, spektral xətlərin ekvivalent enləri ölçülüb. Model üsulu ilə HD207260(A2Ia) ulduzunun atmosferində C, N, Sc, Ti, V, Cr, Fe, Ni, Sr, Zr, Ba elementlərin miqdarı təyin edilərək, Günəşdə olan miqdarla müqayisə aparılıb. Aşkar edilib ki, HD207260(A2Ia) ulduzunun atmosferində C (karbon) elementinin miqdarı Günəşdə olan miqdardan az, N (azot) elementinin miqdarı çox, Sc, Ti, V, Cr, Fe, Ni, Sr, Zr, Ba elementlərinin miqdarı isə Günəşdə olan miqdara yaxındır. Bununla da təkamül nəzəriyyəsinin mülahizələri müşahidələr əsasında təstiqlənib: HD207260(A2Ia) ulduzu və Günəş eyni kimyəvi tərkibli maddədən yaranmışlar, karbon və azot elementlərinin ilkin miqdarında təkamül dəyişkənliyi olmuş, digər elementlərin isə ilkin miqdarı sabit qalmışdır.

Seminar iştirakçıları tərəfindən maraqla qarşılanan məruzənin sonunda mövzu ətrafında geniş müzakirələr aparılıb, suallar cavablandırılıb.

© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.