Avqustun 15-də, AMEA N.Tusi adına Şamaxı Astrofizika Rəsədxanasında (ŞAR) növbəti astroseminar keçirilib.
Seminara rəhbərlik edən f.-r.ü.f.d Bayram Rüstəmov seminarı giriş sözü ilə açaraq, tədbir iştirakçılarına məruzənin mövzusu haqqında məlumat verib.
Sonra rəsədxananın “Planetlər və kiçik səma cisimləri” şöbəsinin müdiri Ədalət Ətayi "Günəş sistemi planetlərinin spektrofotometriyası" mövzusunda məruzəsini seminar iştirakçılarına təqdim edib.
Məruzəçi seminarda Venera, Mars, Yupiter, Saturn, Uran və Neptun planetlərinin atmosferlərinə dair dünya mətbuatında ŞAR-ın əməkdaşları adına yazılmış mühüm elmi nəticələr və onların şərhindən söhbət açıb. Bu elmi nəticələrin toplandığı monoqrafiya, adı Mars planetinin xəritəsindəki kraterlərdən birində əbədiləşdirilmiş Nadir İbrahimovun əziz xatirəsinə həsr olunub.
Seminar iştirakçıları tərəfindən maraqla qarşılanan məruzənin sonunda mövzu ətrafında geniş müzakirələr aparılıb, suallar cavablandırılıb.
Qeyd edək ki, seminarın baş tutduğu tarix məruzəçi üçün 68-ci doğum günü ilə üst-üstə düşdüyü üçün əlamətdar olub.
Ətayi Ədalət Əbülfət oğlu 1951-ci ilin 15 avqust tarixində Goranboy (Qasım İsmayılov) rayonunun Naftalan qəsəbəsində anadan olmuşdur. 1968-ci ildə Naftalan orta məktəbini bitirmiş və elə həmin ildə də BDU-nun fizika fakultəsinə daxil olmuşdur. 1973-cü ildə Bakı Dövlət Universitetini bitirmiş və Milli Elmlər Akademiyasının N.Tusi adına Şamaxı Astrofizika Rəsədxanasına təyinatla göndərilmiş, Planetlər fizikası laboratoriyasında kiçik elmi işçi vəzifəsində çalışmağa başlamışdır. 1975-ci ildə EA-nın aspiranturasına qəbul olunmuş və Nadir İbrahimovun rəhbərliyi altında Günəş sistemi planetlərinin atmosferlərinin tədqiqi ilə məşğul olmağa başlamışdır. N.İbrahimovun vəfatından sonra elmi tədqiqatlarını davam etdirmək üçün Alma-Ata (Qazaxıstan) Astrofizika İnstitutunda görkəmli astrofizik prof. V.Q. Teyfelin rəhbərliyi altında işləmiş və 1981-ci ilin fevralında Kiyev şəhərindəki Baş Astronomiya Rəsədxanasının İxtisaslaşmış Elmi Şurasında “Uran, Neptun və nəhəng planetlərin parlaq peyklərinin spektrofotometriyası” mövzüsunda dissertasiya müdafiə edərək "fizika riyaziyyat elmləri üzrə fəlsəfə doktoru" alimlik dərəcəsi almışdır. 60-dan çox elmi məqalənin və 100-ə yaxın elmi kütləvi məqalələrin müəllifidir. Orta məktəb dərsliyi olan “Astronomiya” kitabının müəlliflərindən biridir. Avropa Astronomiya Cəmiyyətinin üzvüdür. Bir müddət respublika ali məktəblərində - APU və BDU-da ixtisas kursu aparmış, bu gün isə Şamaxı Astrofizika Rəsədxanasında elmi fəaliyyətini davam etdirir.
Əməkdaşımızı 68 yaşı münasibətilə təbrik edir, ona möhkəm cansağlığı, elmi fəaliyyətində yeni nailiyyətlər, tükənməz yaradıcılıq enerjisi arzulayırıq!
© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.
