1 avqust 2019-cu il tarixində AMEA N.Tusi adına Şamaxı Astrofizika Rəsədxanasında (ŞAR) növbəti astroseminar keçirilib.
Rəsədxanasının "Qoşa ulduzlar və eruptiv proseslər" şöbəsinin müdiri, f-r.ü.f.d Bayram Rüstəmov giriş sözü ilə seminarı açaraq, məruzənin mövzusu haqqında tədbir iştirakçılarına məlumat verib.
Daha sonra seminarda ŞAR-ın "Planetlər və kiçik səma cisimləri" şöbəsinin aparıcı elmi işçisi, f.-r.ü.f.d Dmitriy Şestopalov "Əksolunma spektrlərinə əsasən asteroidlərin maddə tərkibi" mövzusunda məruzə ilə çıxış edib.
Məruzəçi Mars və Yupiterin orbitləri arasında yerləşən əsas qurşaqdakı asteroidlərin fiziki xüsusiyyətləri haqqında müasir fikirləri seminar iştirakçılarının diqqətinə çatdırıb. O, müxtəlif optik tipli asteroidlərin əks olunan spektrlərinin interpretasiyasına əsaslanan məsafədən (distansional) mineraloji təhlil metodunun imkanları və məhdudiyyətlərini qeyd edib. Belə ki, asteroidlərin tərkibini bilmək xassələrinə görə protoplanet maddələrin ulduzlararası toz ilə müqayisə oluna bilən ən qədim formalarından magmatik diferensasiya məhsulları olan mafik silikatlara (kimyəvi birləşmələr) qədər təkamülünü izləməyə kömək edir.
Seminar iştirakçıları tərəfindən maraqla qarşılanan məruzənin sonunda mövzu ətrafında geniş müzakirələr aparılıb, suallar cavablandırılıb.
© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.
