İyul ayının 20-i bəşər övladının Aya ayaq basmasının 50-ci il dönümüdür.

1969-cu ildə Apollon layihəsi çərçivəsində Apollon 11, layihə üzrə təşkil olunmuş beşinci kosmik uçuş olmaqla, əvvəlki 4 sınaq uçuşunun uğurlu yekunu olmuşdur.

16 iyul 1969-cu il tarixində Saturn V raketi vasitəsilə Keyp Kennedi kosmodromundan qalxan Apollon 11-in heyəti komandir Neyl Alden Armstronq, idarə modulunun pilotu Maykl Kollins və ay modulunun pilotu Edvin Yucin Oldrindən ibarət idi. 

İyulun 20-də "İql" (Eagle) adlı Ay moduluna keçən Armstronq və Oldrin, kapsul ilə birlikdə ayın səthinə eniblər. Ay kapsulu əvvəlcədən təyin edilmiş eniş nöqtəsindən uzağa düşsə də, Yerdən ayrıldıqdan 110 saat sonra N.Armstronq iyulun 21-də saat 06:56:15-də Aya ilk addımını atmağa müvəffəq olub və bu sözləri işlədib: "Bu, insan üçün kiçik bir addım, bəşəriyyət üçün isə böyük bir sıçrayışdır". Ondan 20 dəqiqə sonra isə E.Oldrin də Aya ayaq basır. Ekipajın üçüncü üzvü Maykl Kollins isə Ay orbitində dövr edən İdarəetmə modulunda qalıb. O, astronavtların Aya çıxması prosesini əlaqələndirdiyindən həmkarlarının Ay gəzintisinə qoşula bilməyib. Ay missiyasını uğurla başa vuran kosmonavtlar iyulun 24-də Yerə qayıdıblar.

Bəşəriyyət üçün böyük sıçrayış olan bu əlamətdar günlə əlaqədar Beynəlxalq Astronomiya İttifaqının (BAİ) təşkilatçılığı ilə “Biz eyni Ayı bölüşürük” proyekti çərçivəsində dünyanın 120 ölkəsində müxtəlif tədbirlər keçirilir. O cümlədən AMEA N.Tusi adına Şamaxı Astrofizika Rəsədxanası (ŞAR) və Tusi-Bohm Planetarium bu tarixi günlə əlaqədar, iyulun 20-də “Açıq qapı” günü elan edir.

Açıq qapı gününün proqramına Şamaxı Astrofizika Rəsədxanasında gündüz ekskursiyası – muzey və 70 sm-lik teleskopla tanışlıq, Tusi-Bohm Planetariumda isə 50 illiklə bağlı film nümayişi, seminar və teleskopla müşahidə daxildir.

© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.