İyul ayının 29-da AMEA N.Tusi adına Şamaxı Astrofizika Rəsədxanasında növbəti astroseminar keçirilib.

Seminarın rəhbəri, f-r.ü.f.d Bayram Rüstəmov seminarı giriş sözü ilə açaraq, tədbir iştirakçılarına məruzənin mövzusu haqqında ətraflı məlumat verib.

Sonra Şamaxı Astrofizika Rəsədxanasının "Qalaktikalar və ulduzəmələgəlmə prosesləri" şöbəsinin müdiri, professor  Nəriman İsmayılov “Cavan ulduzların müşahidəsinin müasir aspektləri” mövzusunda məruzə ilə çıxış edib.

Məruzədə dünya tədqiqatçılarının və müəllifin cavan ulduzların tədqiqində indiyədək aldığı əsas nəticələrin xülasəsi verilib, onların əsas fiziki xassələri qeyd edilib. Cavan ulduzların müasir dövrdə kosmik peyklər vasitəsilə alınan unikal nəticələrindən danışılıb.

Daha sonra isə Avropa Kosmik Agentliyinin GAİA missiyasının ulduzlar haqqında aldığı elmi nəticələrdən bəhs olunan qısa bir film göstərilib.

Sonda mövzu ilə bağlı müzakirələr aparılıb, fərqli yanaşmalar qeyd edilib və suallar cavablandırılıb.

© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.