İyul ayının 4-də, AMEA N.Tusi adına Şamaxı Astrofizika Rəsədxanasında növbəti astroseminar keçirilib.

Seminarın rəhbəri, f-r.ü.f.d Bayram Rüstəmov seminarı giriş sözü ilə açaraq, tədbir iştirakçılarına məruzənin mövzusu haqqında məlumat verib.

Sonra rəsədxananın “Ulduz atmosferləri  fizikası  və  maqnetizm” şöbəsinin aparıcı elmi işçisi, f.r.ü.f.d, dosent Əliqulu Xəlilov seminar iştirakçılarına "HD 208501 (B8 Ib) ulduzun spektrində Hα və dublet natrium NaI D xətlərinin şüa sürətinin dəyişməsi" mövzusunda məruzəsini təqdim edib.

Məruzəçi, HD 208501(B8 Ib) ifratnəhəng ulduzunun 2013-2018-ci il tarixlərində N.Tusi adına Şamaxı Astrofizika Rəsədxanasının 2 metrlik teleskopunda alınmış spektrləri əsasında Hα və dublet NaI D xətləri profillərinin dəyişməsi və spektral parametrlərinin tədqiqinin nəticələrini şərh edib. O qeyd edib ki, ulduzun spektrində Hα xəttinin udulma komponenti ilə dublet natrium NaI D xəttinin şüa sürəti və ekvivalent enin qiyməti zamandan asılı olaraq əks fazada dəyişməsi aşkarlanıb. Ehtimal olunur ki, bu dəyişmə ulduzun döyünməsi və ulduz ilə ulduzətrafı örtüyün qarşılıqlı təsiri nəticəsində baş verə bilər.

Məruzə tədbir iştirakçıları tərəfindən maraqla qarşılanıb, mövzu ətrafında müzakirələr aparılıb və suallar cavablandırılıb.

© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.