İyunun 11-də, AMEA N.Tusi adına Şamaxı Astrofizika Rəsədxanasında növbəti astroseminar keçirilib.

Seminarı Şamaxı Astrofizika Rəsədxanasının “Ulduz atmosferləri fizikası və maqnetizm” şöbəsinin müdiri, f-r.ü.f.d Canməmməd Rüstəmov açaraq, seminar haqqında tədbir iştirakçılarına məlumat verib.

Sonra rəsədxananın "Planetlər və kiçik səma cismləri" şöbəsinin baş elmi işçisi, AMEA-nın müxbir üzvü Əyyub Quliyev "Günəş sistemində naməlum irikütləli planetin varlığı barədə əlavə arqumentlər" (Ə.Quliyev, R.Quliyev) mövzusunda məruzəsini təqdim edib.

Məruzəçi seminar iştirakçılarına adıçəkilən mövzu ətrafında aparılmış hesablamaların nəticələri haqqında geniş məlumat verib. Bu hesablamalar göstərir ki, Günəşdən 330 astrovahid məsafədə böyük meyl bucağı altında hərəkət edən planet cisminin qravitasiya təsirləri komet sistemində özlərini latent şəkildə büruzə verir. Bu təsirləri aşkar etmək üçün müəlliflər yeni riyazi model təklif ediblər.

Məruzə tədbir iştirakçıları tərəfindən maraqla qarşılanıb, mövzu ətrafında müzakirələr aparılıb, suallar cavablandırılıb.

© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.