Mayın 8-də, AMEA N.Tusi adına Şamaxı Astrofizika Rəsədxanasında növbəti astroseminar keçirilib.

Seminarın rəhbəri, f-r.ü.f.d Bayram Rüstəmov seminarı giriş sözü ilə açaraq, tədbir iştirakçılarına məruzənin mövzusu haqqında məlumat verib.

Daha sonra rəsədxananın “Qalaktikalar  və  ulduzəmələgəlmə prosesləri” şöbəsinin aparıcı elmi işçisi, dosent Nazim Hüseynov "Spektral tipini dəyişmiş Seyfert qalaktikası NGC 2617-nin spektral və fotometrik monitorinqi"  mövzusunda məruzəsini təqdim edib.

Məruzəçi nüvənin təbiətini, həndəsi quruluşunu və qalaktikanın təkamülünü başa düşmək üçün mühüm informasiya verməsi baxımından, işıqlığın kəskin artması ilə spektral tipini dəyişən fəal nüvəli qalaktikaların tədqiq edilməsinin aktuallığını seminar iştirakçılarının diqqətinə çatdırıb. O, qeyd edib ki, son illərdə sürətlə genişlənən bu tədqiqatların beynəlxalq əməkdaşlıq çərçivəsində aparılması, müxtəlif ölkələrdən onlarla astronomun iştirakı və müşahidələrə müxtəlif rəsədxanaların, o cümlədən kosmik teleskoplarının cəlb olunması da məsələnin vacibliyindən xəbər verir.

Seminar iştirakçıları tərəfindən maraqla qarşılanan məruzənin yekununda mövzu ətrafında geniş müzakirələr aparılıb və suallar cavablandırılıb.

© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.