03 Aprel 2019-cu il tarixində Avropa Birliyinin Meqaqrantı olan HORİZON 2020 qrant layihəsi çərçivəsində 9 ölkədən (Almaniya, Çexiya, Estoniya, Argentina, İngiltərə, Belçika, Braziliya, Çili və Azərbaycan) olan astronomların canlı video-konfransı keçirilib. AMEA N.Tusi adına ŞAR-ın əməkdaşları f.-r.ü.f.d. Canməmməd Rüstəmov, Rəcəb İsmayıllı, Günay Hacıyeva, Səbinə Məmmədova, Cənnət Səmədov video-konfransda iştirak edib.
Konfrans zamanı müxtəlif rəsədxanalarda alınan spektrlərin bir verilənlər bazasında toplanması, bu spektrlərin birgə işlənilməsi və nəticələrin birgə məqalələr şəklində çap olunması qaydaları geniş müzakirə olunub. Tərəflər bir-birini maraqlandıran suallara cavab verib.
Hal-hazırda Estoniya Respublikasının Tartu rəsədxanasında olan ŞAR əməkdaşı Aynur Abdulkərimovanın yerinə yetirdiyi işlər, Günay Hacıyevanın iyun ayında Tartu rəsədxanasına və Səbinə Məmmədovanın iyul ayında Çexiyanın Ondrejyev rəsədxanasına ezamiyyətləri, bu ezamiyyətlər zamanı görülməsi nəzərdə tutulan işlər müzakirə edilib.
Sonda nəzəri istiqamətdə grant layihəsi çərçivəsində yerinə yetirilməsi nəzərdə tutulan elmi-tədqiqat işlərinin müzakirəsi üçün növbəti video-konfransın may ayında keçirilməsi qərarlaşdırılıb.
© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.
