Aprel ayının 3-də, AMEA N.Tusi adına Şamaxı Astrofizika Rəsədxanasında növbəti astroseminar keçirilib.

Seminarı Şamaxı Astrofizika Rəsədxanasının "Qoşa ulduzlar və eruptiv proseslər" şöbəsinin müdiri, f-r.ü.f.d Bayram Rüstəmov açaraq, seminar haqqında tədbir iştirakçılarına məlumat verib.

Sonra rəsədxananın “Ulduz atmosferləri fizikası və maqnetizm” şöbəsinin müdiri, f-r.ü.f.d Canməmməd Rüstəmov "Möcüzəli sıx qoşa ulduz beta Lyr" (C.N.Rüstəmov, A.F.Abdulkərimova) mövzusunda icmal məruzəsini təqdim edib.

Məruzəçi beta Lyr ulduzunun qeyri adi spektral və fotometrik xüsusiyyətləri ilə əlaqədar indiyə kimi aşkar edilmiş elmi məlumatlar barədə seminar iştirakçılarına geniş məlumat verib. Eyni zamanda bu ulduzla əlaqədar olan həll olmamış problemlər şərh edilib. ŞAR-da bu ulduzun spektral və fotometrik müşahidələrinin aparılmasının vacibliyi diqqətə çatdırılıb. Qeyd edilib ki, bu ulduzda gedən fiziki proseslərin mahiyyətinin dəqiq anlaşılması və bu ulduzun müşahidələrin nəticələri ilə uyğunlaşan modelinin qurulması üçün bu tədqiqatlar mühüm əhəmiyyət kəsb edir.

Məruzə tədbir iştirakçıları tərəfindən maraqla qarşılanıb, mövzu ətrafında müzakirələr aparılıb, suallar cavablandırılıb.

© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.