28-31 mart 2019-cu il tarixlərində Şamaxı Astrofizika Rəsədxanasında Azərbaycan Milli Elmlər Akademiyası Beynəlxalq İslam Fikri İnstitutu (ABŞ) ilə birlikdə “İslam mədəniyyətində tolerantlıq və onun bəşər mədəniyyətinin inkişafında rolu (Azərbaycan modeli)” adlı elmi konfrans keçirilib.
Tədbirdə AMEA Fəlsəfə İnstitutunun direktoru, fəlsəfə elmləri doktoru, professor İlham Məmmədzadə, AMEA Rəyasət Heyəti aparatının Mətbuat və informasiya idarəsinin rəisi Zülfüqar Fərzəliyev, həmçinin Ukraynadan olan alimlər, AMEA Fəlsəfə və Ədəbiyyat institutlarının əməkdaşları iştirak ediblər.
Konfransı professor İlham Məmmədzadə açaraq Azərbaycanda multikulturalizmin tarixi ənənələrindən danışıb və tarixən ölkəmizdə müxtəlif xalqların və etnik qrupların nümayəndələrinin milli, dini və irqi mənsubiyyətindən asılı olmayaraq sülh, əmin-amanlıq və qarşılıqlı anlaşma şəraitində yaşayıb, həmrəylik nümayiş etdirdiyini qeyd edib.
Daha sonra Ukrayna İslam Tədqiqatlar Mərkəzinin magistrantı Oleq Kuzik "Ukraynada dinlərarası münasibətlər və multikulturalizm" mövzusunda çıxış edərək multikulturalizmin Azərbaycan modelinin Ukrayna üçün böyük əhəmiyyət kəsb etdiyini bildirib.
Elmi konfransda multikulturalizmlə əlaqədar çıxışlarda Azərbaycanda multikulturalizmin siyasi, fəlsəfi və iqtisadi aspektlərinin kifayət qədər öyrənildiyi və multikulturalizmin Azərbaycan modelinin post-sovet məkanı üçün böyük fayda verə biləcəyi qeyd olunub.
Konfransda AMEA N.Tusi adına ŞAR-ın əməkdaşı “Ulduz atmosferləri fizikası və maqnetizm”şöbəsinin müdiri, f-r.ü.f.d Canməmməd Rüstəmov çıxış edib və konfrans iştirakçılarına ŞAR-ın yaranma tarixi, orada olan teleskoplar, rəsədxanada aparılan elmi-tədqiqat işləri, beynəlxalq elmi əlaqələr və qarşıda duran vəzifələr haqqında geniş məlumat verib.
Sonda Canməmməd Rüstəmov konfrans iştirakçılarını ŞAR-ın 2-m teleskopu ilə tanış edib və bu teleskopda aparılan elmi-tədqiqat işləri barədə qonaqlara ətraflı məlumat verib.
http://science.gov.az/news/open/10069
© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.
