AMEA N.Tusi adına Şamaxı Astrofizika Rəsədxanasının baş elmi işçisi, fizika-riyaziyyat elmləri doktoru Sabir Məmmədovun anadan olmasının 85-ci ili tamam olur.
Sabir Məmmədov 10 fevral 1934-cü ildə Gürcüstan Respublikası Marneuli rayonunun Kirəc-Muğanlı kəndində anadan olmuşdur. 1951-ci ildə orta məktəbi bitirərək, elə həmin ildə də, Bakı Dövlət Universitetinin fizika-riyaziyyat fakültəsinin “Fizika” bölməsinə daxil olmuşdur. 1956-cı ildə Universiteti bitirdikdən sonra Şamaxı Astrofizika Rəsədxanasında elmi işçi olaraq əmək fəaliyyətinə başlamışdır.
S. Məmmədov 1959-cu ildə Sankt-Peterburq şəhərində Pulkovo Rəsədxanasının nəzdində aspiranturaya daxil olmuşdur. O, 1962- ci ildə SSRİ Elmlər Akademiyasının müxbir üzvu professor V.A. Kratın rəhbərliyi altında “Zəif xromosfer alışmaları” mövusunda namizədlik dissertasiyası müdafiə edərək, fizika-riyaziyyat elmləri namizədi elmi dərəcəsini almışdır. 2008-ci ildə S.Məmmədov “Günəş atmosferində dinamik proseslər” mövzusunda doktorluq dissertasiyasını müdafiə etmişdir.
Onun elmi fəaliyyətinin əsasını Günəş atmosferində baş verən aktiv və dinamik fiziki proseslərin tədqiqi təşkil edir. S.Məmmədovun indiyədək yerli və xarici jurnallarda 80-dən artıq elmi məqalələsi dərc edilmişdir.
Alimi 85 illik yubileyi münasibətilə təbrik edir, ona möhkəm cansağlığı, elmi fəaliyyətində yeni nailiyyətlər, tükənməz yaradıcılıq enerjisi arzulayırıq!
© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.
