Yanvarın 30-da AMEA N.Tusi adına Şamaxı Astrofizika Rəsədxanasında növbəti astroseminar keçirilib.

Rəsədxananın Bakı bölməsində baş tutan tədbiri giriş sözü ilə açan Şamaxı Astrofizika Rəsədxanasının elmi işlər üzrə direktor müavini, f-r.ü.f.d Elçin Babayev seminar haqqında tədbir iştirakçılarına məlumat verib.

Sonra rəsədxananın “Ulduz atmosferləri fizikası və maqnetizm”şöbəsinin aparıcı elmi işçisi, f-r.ü.f.d Əliqulu Xəlilov "Yüksək qalaktik enlikdə yerləşən 89 Her (F2 Ibe) ifratnəhəng ulduzunun spektrində NaI D xəttinin profilinin və şüa sürətinin dəyişməsi xüsusiyyətləri " (Ə.M.Xəlilov, Ə.R.Həsənova, G.M.Hacıyeva) mövzusunda məruzəsini təqdim edib.

Məruzəçi bildirib ki, Şamaxı Astrofizika Rəsədxanasının 2 m-lik teleskopunda alınmış spektrlər və 1961-2006-ci illərdə nəşr olunmuş işlər əsasında 89 Her ulduzunun Hα və dublet NaI D xəttinin profilləri tədqiq olunub:

“Aşkar olunmuşdur ki, Hα xəttinin udulma komponentinin şüa sürəti və ekvivalent eni, şüalanma komponentinin şüa sürəti və dublet NaID xəttinin şüa sürəti 5000 günlük periodla sinxron dəyişir. Həmçinin, spektral qoşa ulduz modeli nəzəriyyəsinə əsasən qoşa sistemin orbital elementləri hesablanmışdır”.

Məruzə tədbir iştirakçıları tərəfindən maraqla qarşılanıb, mövzu ətrafında müzakirələr aparılıb, suallar cavablandırılıb.

© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.