İlk dəfə şəxs adı ilə adlandırılan zond artıq Günəş ətrafında ilk tam dövrünü edib. “Parker Prob Solar” zondu 12 avqust 2018-ci ildə NASA təfərindən Günəşi tədqiq etmək məqsədilə buraxılıb.

Zond dinamik genişlənən Günəş tacı - Günəş küləyi fərziyyəsini irəli sürmüş amerikalı fizik E.N.Parkerin şərəfinə belə adlandırılıb.  

Ölçüləri 1x3x2,3 m, kütləsi 555 kq olan “Parker Prob Solar”zondu  altı illik fəaliyyəti dövründə  Günəş küləyinin mənbəyində maqnit sahələrinin strukturunu və dinamikasını müəyyən etmək, Günəş tacı tərəfindən şüalanan enerjinin səviyyələrini və Günəş küləyinin təcilini müəyyən etmək, həmçinin Günəş yaxınlığında plazma hissəciklərini, onların Günəş küləyinə təsirini və enerjili hissəciklərin yaranması kimi məsələləri öyrənəcək.

Hazırda zond Günəşdən 0,933 a.v. məsafədə olmaqla 17,18 km/san.sürətlə hərəkət edir.

Ümumilikdə, cari ilin kosmik hadisələrlə zəngin il olacağı gözlənilir. Orbitə “Spektr-RG” astrofiziki rəsədxananın buraxılması Kainatın tam xəritəsinin çəkilməsinə kömək edəcəkdir.

Qeyd edək ki, “Spektr-RG” Rusiya - Almaniya beynəlxalq layihəsidir və Orbital Astrofiziki Rəsədxananın yaradılması məqsədi daşıyır. “Spektr-RG” vasitəsilə Kainatın rentgen dalğa uzunluğu diapazonunda öyrənilməsi nəzərdə tutulmuşdur. Aparat Günəş – Yer sistemində L2 Laqranj nöqtəsi ətrafına çıxarılacaq.

Astrofiziki tədqiqatlar 7-7,5 il müddətinə (4 il ulduz səmasını skaner etmək rejimində işləməsi və 3,5 il Kainatın nöqtəvi obyektlərinin müşahidəsi) nəzərdə tutulur.

Əlaqəli link: http://parkersolarprobe.jhuapl.edu/The-Mission/index.php#Where-Is-PSP   

© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.