Dekabrın 11-də AMEA N. Tusi adına Şamaxı Astrofizika Rəsədxanasının (ŞAR) Dissertasiya Şurasında ŞAR-ın "Qoşa ulduzlar və eruptiv proseslər" şöbəsinin elmi işçisi Məmmədova Səbinə Oleqovanın astronomiya üzrə fəlsəfə doktoru elmi dərəcəsi almaq üçün dissertasiya işinin müdafiəsi keçirilib.
“UX Ori tipli WW vul ulduzunun spektral və fotometrik xüsusiyyətləri” mövzusunda tədqiqat işinin elmi rəhbəri f.-r.ü.f.d. Bayram Rüstəmov, opponentləri f.-r.e.d. Sabir Məmmədov və f.-r.e.d. Abid Rzayevdir.
Dissertasiya işi UX Ori tipli tipli ulduzların ən maraqlı nümayəndələrindən biri olan WW Vul ulduzunun 2006-2010-cu illərdə ŞAR-ın 2 m-lik teleskopunun Kasseqren fokusunda 580-530 piksel CCD kamera ilə təchiz olunmuş eşelle spektrometrdə alınmış spektrlərin analizinə həsr olunub.
Tədqiqatçı bildirib ki, bizim spektral müşahidələrimiz ulduzun V fotometrik zolağında parlaqlıq əyrisində baş vermiş optik tutulmadan əvvəl (2006-2008-ci illər) və sonraya (2010-cu il) təsadüf etmişdir. İşin məqsədi ulduzun parlaqlığının bu kimi ekstermal vəziyyətlərində spektrdə baş verən dəyişkənliklərin ulduzun fotometrik halı ilə müqayisəli təhlilidir.
Tədqiqat işi dissertasiya şurasının üzvləri tərəfindən yüksək qiymətləndirilib və astronomiya üzrə fəlsəfə doktoru elmi dərəcəsi almağa layiq görülüb.
© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.
