Dekabrın 3-də AMEA N.Tusi adına Şamaxı Astrofizika Rəsədxanasının Elmi Şurasının növbəti iclası keçirilib.

Rəsədxanada fəaliyyət göstərən şöbələrin 2018-ci ildəki elmi və elmi - təşkilati fəaliyyətinin yekunlarına həsr olunmuş hesabat xarakterli tədbirdə Elmi Şuranın üzvləri və digər əməkdaşlar iştirak ediblər. 

Rəsədxananın direktoru, AMEA-nın müxbir üzvü Namiq Cəlilov çıxış edərək gündəlikdəki məsələlər barədə tədbir iştirakçılarına məlumat verib. Direktor, həmçinin 21-28 noyabr tarixlərində Rusiya Federasiyasına ezamiyyəti barədə tədbir iştirakçılarına məlumat verib. Qeyd edib ki, “Fizika və lirika: dünya təcrübəsi və MDB ölkələrinin elm və ədəbiyyat reallıqları” adlı beynəlxalq konfrans çərçivəsində Rusiyanın Dubna şəhərində yerləşən Birləşmış Nüvə Tədqiqatları Mərkəzində və Rusiya Elmlər Akademiyasının Yer Maqnetizmi, İonosfer və Radio Dalğalarının Yayılması İnstitutunda (İZMİRAN) bir sıra görüşlər keçirilib.

Azərbaycan-Rusiya birgə beynəlxalq qrantı üzrə birgə məsləhətləşmələr aparılıb və adı çəkilən qrant çərçivəsində İZMİRAN-dan Şamaxı Astrofizika Rəsədxanasına şuman rezonatorunun (yerin maqnit sahəsindəki dəyişiklikləri ölçmək üçün cihaz) gətirilməsi, 2019-cu ilin aprelində Şamaxı Astrofizika Rəsədxanasında Yer - Günəş əlaqələri fizikası sahəsində birgə konfransın keçirilməsi ilə bağlı danışıqlar aparılıb.  

Sonra “Ulduz atmosferləri fizikası və maqnetizm”şöbəsinin müdiri, f.-r.ü.f.d. Canməmməd Rüstəmov, “Ulduz atmosferləri fizikası və  maqnetizm”şöbəsinin aparıcı elmi işçisi, f.-r.ü.f.d. Sabir Əliyev, “Qalaktikalar və ulduzəmələgəlmə prosesləri “şöbəsinin müdiri, f.-r.e.d. Nəriman İsmayılov, “Qoşa ulduzlar və eruptiv proseslər” şöbəsinin müdiri, f.-r.ü.f.d. Bayram Rüstəmov, “Qalaktikalar və ulduzəmələgəlmə  prosesləri “ şöbəsinin aparıcı elmi işçisi,  f.-r.ü.f.d. Nazim Hüseynov, “Kosmik plazma və Heliogeofiziki problemlər” şöbəsinin aparıcı elmi işçisi, f.-r.ü.f.d. Şirin Hüseynov və rəsədxananın elmi işlər üzrə direktor müavini, f.ü.f.d. X.Mikayılov elmi-tədqiqat mövzuları üzrə hesabatla çıxış ediblər.

Çıxış edən natiqlər bildiriblər ki, hesabat ilində işlədikləri elmi-tədqiqat mövzuları üzrə bir sıra elmi-tədqiqat işləri aparılıb və müəyyən elmi nəticələr əldə edilib.

Tədbirin sonunda hesabatla bağlı suallar cavablandırılıb.

© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.