İyunun 30-da N.Tusi adına Şamaxı Astrofizika Rəsədxanasında ( ŞAR) Kosmologiya və Astronomiyaya aid Azərbaycanda ən böyük düşərgə olan "Asteroid day" I Kosmologiya Yay Düşərgəsi təşkil olunub.

Həvəskar Astronomlar Qrupunun təşkil etdiyi düşərgədə Geo Club, Astronomy Azerbaijan, Rezonans və Kosmologiya komandaları da fəal iştirak edib.

Məqsəd elmi təbliğ etmək, kosmologiya və astronomiya sevərlərlə bir gecə də olsa, virtualdan çıxıb ulduzlu səma altında üzbə-üz elmi müzakirələr etmək idi.

Düşərgə iştirakçıları qarşısında elmi-populyar məruzə ilə çıxış edən ŞAR-ın şöbə müdiri, f.ü.f.d. dosent Ədalət Ətayi onlara Azərbaycanda astronomiya elminin müasir vəziyyəti və perspektiv inkişaf istiqamətlərinə dair məlumat verib. 

ŞAR-ın şöbə müdiri, f-r.ü.f.d. dosent Canməmməd Rüstəmovun Böyük Partlayış (Big Bang) haqqında məruzəsi də düşərgə iştirakçıları tərəfindən maraqla qarşılanıb.

Sonda təşkilarçılar layihənin həyata keçirilməsində onlara dəstək olan ŞAR-ın direktoru, AMEA-nın müxbir üzvü Namiq Cəlilova, ŞAR-ın Gənc Alim və Mütəxəssislər Şurasının sədri Famil Mustafaya və ŞAR-ın kiçik elmi işçisi Səbahəddin Alışova öz təşəkkürlərini bildiriblər.

© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.