NGC 3256 pekulyar qalaktikası burulmuş toz zolaqları, qabarma təsirindən yaranan geniş yayılmış quyruqları (kosmik toqquşmanın nəticəsində) və qeyri-adi parlaq mərkəzi oblastı ilə seçilir.

Ölçüsü 100 min işıq ilindən artıq oblastı əhatə edən iki müxtəlif qalaktikanın toqquşması 500 milyon ildir davam edir. Xabbl kosmik teleskopu ilə alınmış şəkildə bu öz əksini tapıb.

Toqquşmada iştirak edən iki qalaktikanın qovuşması zamanı, bir qayda olaraq ona daxil olan ulduzların toqquşması baş vermir. Ancaq qalaktikada mövcud olan nəhəng molekulyar qaz və toz buludlarının qarşılıqlı təsiri baş verir və bunun nəticəsində effektiv ulduz əmələgəlmə prosesləri baş verir. 

Bu toqquşmada iştirak edən iki spiral qalaktika təxminən eyni kütləyə malik olub. Artıq onların disklərini ayırd etmək mümkün deyil. Qalaktikaların nüvəsi isə işığı udan toz örtüyü ilə əhatə olunub.

Bir neçə milyon ildən sonra nüvələr birləşəcək və NGC 3256 böyük bir elliptik qalaktikaya çevriləcək (İki spiral qalaktikanın toqquşması zamanı həmişə bir nəhəng elliptik qalaktika yaranır)

NGC 3256  Yelkən (Vela) cənub bürcündə və bizdən yüz milyon işıq ili məsafəsində yerləşir. Görüş sahəsinə difraksiya şüaları ilə əhatə olunmuş daha uzaq qalaktikalar və yaxın ulduzlar düşüb.

Mənbə: www.astronet.ru    

© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.