
“NASA”nın hesablamasına görə, 18 noyabr 2026-cı ildə Bakı vaxtı ilə saat 14:16:07-də Voyager 1 Yerdən 1 işıq günü məsafədə olacaq. Bu 25,9 milyard kilometrə bərabərdir və o, Yerdən bu qədər uzaqlaşan ilk kosmik zond olacaq.
Voyager “NASA”nın layihəsidir və Günəş sisteminin hüdudlarını tədqiq etmək məqsədilə hazırlanmışdır. 1977-ci ildə buraxılan zondlar uzunmüddətli missiya üçün hazırlanmışdı və Günəşin heliosferini tərk edən ilk insan əli ilə hazırlanmış cihazlardır.
Voyager 1 Günəşə nəzərən təxminən 61 000 km/saat sürətlə, şimala İlandaşıyan bürcü istiqamətində hərəkət edir. Voyager 2 isə Yerdən təxminən 21,7 milyard kilometr uzaqdadır və 55 000 km/saat sürətlə cənuba, Tovuzquşu bürcü istiqamətində irəliləyir.
Son məlumatlra əsasən Voyager 1-də iki, Voyager 2-də üç elmi cihaz aktivdir. Hər iki zondda maqnitometr və plazma dalğalarını ölçən cihaz aktivdir. Voyager 2-də isə kosmik şüa detektoru da işləkdir. Qeyd edək ki, zondlarda uzunmüddətli enerji mənbəyi kimi Pu-238 radioizotpu istifadə olunub və generatorun gücü azaldıqca cihazlar mərhələli şəkildə söndürülüb. Hal-hazırda Voyager 1-ə siqnalın gedib-qayıtması təxminən 48 saat çəkir. Voyager 1-in siqnalları Qoldstoun və Madriddə, Voyager 2-nin isə Avstraliyanın Kanberra kompleksində qəbul olunur. Hər iki zondda qızıl suyuna çəkilmiş mis Qızıl disk yerləşdirilib. Həmin diskdə Yer kürəsindən 115 təsvir, təbiət səsləri, 55 dildə “salam” və müxtəlif xalqların musiqi parçaları yazılıb.
Kosmik zondlar öz fəaliyyətləri dövründə Günəş sisteminin xarici planetləri -Yupiter və Saturn, Uran və Neptunu tədqiq edib. Voyager 1 Yupiterin zəif halqasını kəşf edib və onun peyki İoda aktiv vulkanların olmasını təsdiqləyib. Saturnun peyki Titanın atmosferinin əsasən azotdan ibarət olduğunu göstərib. Uran və Neptunun yaxınlığından keçən Voyager 2 isə Uranda yeni peyklər və halqalar, Neptunda Böyük Qaranlıq Ləkə, onun peyki Tritonda isə aktiv qeyzerlər aşkar edib.
Voyager 1-dən geri qalan Voyager 2 isə 2035-ci ildə Yerdən bir işıq günü qədər uzaqlaşacaq. Eyni vaxtda buraxılan zondların fərqli sürətə malik olmaqlarından əlavə trayektoriyaları da eyni deyildi. Voyager 2 Yupiterlə, Saturndan əlavə Uran və Neptuna da yaxınlaşan ilk kosmik zonddur.
© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.