Azərbaycan Respublikası Elm və Təhsil Nazirliyi Nəsirəddin Tusi adına Şamaxı Astrofizika Rəsədxanasında (ŞAR) 8 Noyabr – Zəfər Günü münasibətilə tədbir keçirilib.
Tədbirdən əvvəl Rəsədxana kollektivi Şamaxı şəhərində yerləşən Şəhidlər xiyabanını ziyarət edib, Vətən uğrunda canından keçən qəhrəmanların əziz xatirəsini ehtiramla yad edib, məzarları önünə tər çiçəklər qoyub.
Rəsədxananın konfrans zalında davam edən tədbir Azərbaycan Respublikasının Dövlət Himninin səsləndirilməsi ilə başlayıb. Daha sonra Vətən uğrunda canlarından keçən şəhidlərimizin əziz xatirəsi bir dəqiqəlik sükutla yad olunub.
Tədbiri giriş sözü ilə açan Şamaxı Astrofizika Rəsədxanasının baş direktoru, AMEA-nın müxbir üzvü Namiq Cəlilov 8 Noyabr – Zəfər Gününün xalqımızın tarixində mühüm yer tutduğunu bildirib. O, Müzəffər Ali Baş Komandan, Prezident İlham Əliyevin rəhbərliyi ilə Azərbaycan Ordusunun qazandığı tarixi Qələbənin xalqımızın milli birliyinin, sarsılmaz iradəsinin və Vətənə bağlılığının təntənəsi olduğunu vurğulayıb.
Namiq Cəlilov qeyd edib ki, Zəfərimiz Azərbaycanın dövlətçilik tarixində yeni mərhələnin əsasını qoyub, ölkəmizin suverenliyinin və ərazi bütövlüyünün tam bərpası ilə nəticələnib. Bu gün azad edilmiş ərazilərdə həyata keçirilən genişmiqyaslı bərpa və quruculuq işləri isə Azərbaycanın gücünü və gələcəyə inamını nümayiş etdirir.
Tədbirdə Rəsədxananın icraçı direktoru, professor Nəriman İsmayılov, “Planetlər və kiçik səma cisimləri” şöbəsinin baş elmi işçisi, AMEA-nın müxbir üzvü Əyyub Quliyev, “Elmi əlaqələr və təşkilati işlər” şöbəsinin müdiri, fizika-riyaziyyat üzrə fəlsəfə doktoru, ehtiyatda olan polkovnik Kamal Hüseynov, “Ulduz atmosferləri fizikası və maqnetizm” şöbəsinin müdiri, astronomiya elmləri doktoru Canməmməd Rüstəmov və “Planetlər və kiçik səma cisimləri” şöbəsinin elmi işçisi, fizika-riyaziyyat üzrə fəlsəfə doktoru, dosent Fazil İsmayılov çıxış ediblər.
Çıxışlarda xalqımızın 44 günlük Vətən müharibəsində nümayiş etdirdiyi birlik və həmrəylikdən, Azərbaycan Ordusunun qəhrəmanlığından, əldə olunan tarixi Zəfərin ölkəmizin ictimai-siyasi həyatındakı əhəmiyyətindən bəhs olunub. Qeyd edilib ki, Vətən müharibəsində qazanılan Qələbə xalqımızın milli ruhunun, dövlətinə və ordusuna olan inamının parlaq təzahürüdür. Həmçinin şəhidlərimizin əziz xatirəsinin daim yaşadılmasının və gənc nəslin vətənpərvərlik ruhunda tərbiyə olunmasının vacibliyi vurğulanıb.
Tədbirin sonunda 8 Noyabr – Zəfər Gününə həsr olunmuş videoçarx nümayiş etdirilib.
© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.
