26 avqust 2026-cı il tarixində Azərbaycan Respublikası Elm və Təhsil Nazirliyi N.Tusi adına Şamaxı Astrofizika Rəsədxanasında (ŞAR) növbəti astroseminar keçirilib.

Seminarı ŞAR-ın icraçı direktoru, professor Nəriman İsmayılov açaraq iştirakçıları salamlayıb, onlara məruzənin mövzusu barədə məlumat verib.

Daha sonra Şamaxı Astrofizika Rəsədxanasının “Ulduz atmosferləri fizikası və maqnetizm“ şöbəsinin böyük elmi işçisi Ülkər Rüstəm “HD 174481(A7III) və HD203925(A8III) ulduzlarının kimyəvi tərkibi” mövzusunda məruzə ilə çıxış edib.

Təqdim olunan işdə model üsulu ilə HD174481 (A7III) və HD203925(A8III) ulduzlarının atmosferləri tədqiq olunmuşdur. [c₁], Q fotometrik kəmiyyətlərinin, hidrogenin Balmer seriyasının spektral xətlərinin ekvivalent enlərinin müşahidə və nəzəri qiymətlərinin müqayisəsi və parallaksın tədbiqi əsasında baxılan ulduzların effektiv temperaturları və səthlərində ağırlıq qüvvəsinin təcili təyin edilmişdir. FeII xəttləri əsasında ulduzların atmosferlərində mikroturbulentlik parametri təyin edilmişdir. Ulduzların atmosferlərində bəzi elementlərin miqdarı hesablanmış və Günəşdə olan miqdarla müqayisə edilmişdir. Aşkar edilmişdir ki, elementlərin miqdarı Günəşdə olan miqdara yaxındır.

Tədbir iştirakçıları tərəfindən maraqla qarşılanan çıxışın yekununda mövzu ətrafında geniş müzakirə olunub və məruzəçi tərəfindən iştirakçıların sualları cavablandırılıb.

© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.