İyunun 18-də Azərbaycan Respublikası Elm və Təhsil Nazirliyi N.Tusi adına Şamaxı Astrofizika Rəsədxanasında (ŞAR) növbəti astroseminar keçirilib.

Seminarı ŞAR-ın elmi katibi, astronomiya üzrə fəlsəfə doktoru, dosent Orxan Xəlillov açaraq iştirakçıları salamlayıb, onlara məruzənin mövzusu və aktuallığı barədə qısa məlumat verib.

Daha sonra Şamaxı Astrofizika Rəsədxanasının “Planetlər və kiçik səma cisimləri“ şöbəsinin baş elmi işçisi, AMEA-nın müxbir üzvü Əyyub Quliyev “Kometlər və Trans-Neptun cisimləri” mövzusunda məruzə ilə çıxış edib.

Məruzədə bir-biri ilə üzvü bağlı olan iki məsələ şərh edilib. Onlardan birincisi Günəş sisteminin Trans-Neptun zonasında varlığı ehtimal olunan irikütləli naməlum planetin komet sistemi ilə əlaqəsidir. Bu hissədə 2017-2026-cı illərdə tapılmış yeni kometlərin parametrlərinin Ə.Quliyevə mənsub olan hipotezlə uyğunluğu məsələsi təhlil edilib. Təhlil 4 parametr üzrə aparılıb: Komet perihellərinin koordinatları, kometlərin afel məsafələri, orbitlərin düyün məsafələri və Tisseran sabiti. Bu parametrlər üzrə statistik təhlil göstərir ki, yeni kometlərin hipotezlə uyğunluğu 2017-ci ilədək məlum olan kometlərdən daha üstündür.

Məruzənin ikinci hissəsində ŞAR-ın fəlsəfə doktoru hazırlığı üzrə əyani doktorantı Bənövşə Əsgərova mütləq parlaqlığı 5.5-ə qədər olan 183 Trans-Neptun planet cisminin 1647 uzunperiodlu kometlərlə mümkün əlaqəsini şərh edib. Meyar kimi kometlərin uzaq düyün nöqtələrinin helisentrik məsafəsi və TNO-komet sistemindəki MOİD məsafələr götürülmüşdür. Hesablamalardan məlum olmuşdur ki, Baxılan TNO cisimlərindən 8-i bu mənada maraq kəsb edir. Onların MOİD məsafələri kifayət qədər kiçik və TNO-ların təsir radiusu ilə müqayisə oluna biləndir. Uzaq düyün nöqtələrinin statistikasında bu cisimlər üzrə 95 faiz etibarlılıq dərəcəsinə malik üstünlük tapılmışdır.

Məruzə seminar iştirakçılarının marağına səbəb olub. Mövzu ətrafında geniş müzakirələr aparılıb, verilən suallar məruzəçi tərəfindən ətraflı cavablandırılıb.

© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.