Kosmik hava durumu – Hesabat dövrü ərzində Günəşin fəallığı artıb və əsasən M və X sinif alışmalar baş vermişdir. Maksimal sinifli alışma 4455 ləkə regionunda X1.0 sinifli alışma olmuşdur. Alışmalara bağlı olaraq II-IV tip radioemissiya, radio sinallarda R2-R3 səviyyəli fasilələr, həmçinin Yerə istiqamətlənmiş Tac Kütlə Atılmaları (TKA) isə müşahidə olunmuşdur. Günəşin səthində ləkələrin sayı azalaraq 8 ləkə qrupunda 124 ləkə və Tac dəlikləri müşahidə olunur. 

Hesabat dövrü ərzində enerjisi 2 MeV-dən çox olan elektron seli orta və yüksək səviyyədə olmuş, 2874 pfu-dək yüksəlmişdir. 10 MeV-dən çox enerji yüklü proton seli isə fon səviyyəsində qalmışdır. 

Günəş küləyinin maksimal sürəti 758 km/san–dək artmışdır. Yer orbitində planetlərarası maqnit sahəsinin maksimal qiyməti 20 nT, radial istiqamətdə isə -17 nT olmuşdur. Hal-hazırda Günəş küləyinin sürəti 488 km/san, planetlərarası maqnit sahəsinin maksimal qiyməti 4.32 nT, radial istiqamətdə isə -0.9 nT təşkil edir. 

Hesabat dövründə baş vermiş alışmalara bağlı TKA-ın təsiri ilə 5-6 iyunda G1-G2 səviyyəli geomaqnit qasırğası baş vermişdir.

Kosmik hava proqnozu – Proqnoz günlərində (8-14 may) C sinif alışmanın baş verməsi ehtimalı 95%, M (R1-R2) sinif alışmanın baş verməsi ehtimalı 55%, X (R3) sinif alışmanın baş verməsi ehtimalı isə 10% təşkil edir. 

Enerjisi 2 MeV-dən çox olan elektron selinin və 10 MeV-dən çox enerji yüklü proton selinin 6 iyunda baş vermiş TKA-nın Yerə çatması ilə yüksələcəyi gözlənilir. 

Günəş küləyinin də 6 iyunda baş vermiş TKA-nın təsirilə 8-9 iyunda normadan yüksək olacağı gözlənilir.  

Avroraların müşahidə olunması ehtimalı isə yüksək geomaqnit enliklərdə 5–85%, orta geomaqnit enliklərdə isə 15-50%-dir. 

Geomaqnit sahəsi – ardıcıl baş vermiş TKA-ın Yerə təsiri ilə 8-10 iyun tarixlərində G3 səviyyəsinədək, yəni güclü geomaqnit qasırğası gözlənilir.

 © Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.