Tusi Bohm Planetariumda 12 Aprel – Ümumdünya Aviasiya və Kosmonavtika Gününə həsr olunmuş “Ulduzlara Doğru – Gənclər Zirvəsi” adlı elmi-populyar tədbir təşkil olunub.Azərbaycan Respublikası Elm və Təhsil Nazirliyinin Nəsirəddin Tusi adına Şamaxı Astrofizika Rəsədxanası (ŞAR), Tusi Bohm Planetarium və Sumqayıt Dövlət Universitetinin birgə təşkilatçılığı ilə baş tutan tədbirdə Nəsirəddin Tusi adına Şamaxı Astrofizika Rəsədxanasının əməkdaşları, Sumqayıt Dövlət Universitetinin professor-müəllim heyəti və tələbələri iştirak ediblər.
Təşəbbüsün əsas məqsədi gənclərin kosmonavtika və astronomiya sahəsinə marağının artırılması, onların müasir astronomiya ilə bağlı elmi nailiyyətlər barədə məlumatlandırılması, eləcə də elmi-tədqiqat fəaliyyətinə təşviq edilməsi olub.
Tədbirin rəsmi hissəsi aparıcının iştirakçıları salamlaması ilə başlayıb. Açılış zamanı kosmonavtikanın bəşəriyyətin elmi-texnoloji inkişafındakı rolu xüsusi vurğulanıb, gənclərin bu sahədə bilik və bacarıqlarının artırılmasının vacibliyi qeyd edilib.
Proqram çərçivəsində Şamaxı Astrofizika Rəsədxanasının elmi katibi, astronomiya üzrə fəlsəfə doktoru, dosent Orxan Xəlilov açılış nitqi ilə çıxış edərək kosmik tədqiqatların strateji əhəmiyyətindən, bu istiqamətdə dünyada həyata keçirilən elmi fəaliyyətlərdən və beynəlxalq əməkdaşlıq imkanlarından bəhs edib. O, xüsusilə gənc nəslin elmə cəlb olunmasının gələcək elmi inkişaf üçün mühüm amil olduğunu diqqətə çatdırıb.
Daha sonra Sumqayıt Dövlət Universitetinin Təbiət elmləri fakültəsinin Fizika kafedrasının müdiri, fizika üzrə fəlsəfə doktoru, dosent Gülnarə Quliyeva çıxış edərək müasir dövrdə fundamental elmlərin, xüsusilə fizika və astronomiyanın əhəmiyyətindən danışıb, tələbələrin elmi fəaliyyətə aktiv qoşulmasının vacibliyini vurğulayıb.
Tədbirin elmi hissəsi çərçivəsində bir sıra aktual mövzular üzrə məruzələr təqdim olunub. ŞAR-ın elmi işçisi Aysel Rüstəmova və Sumqayıt Dövlət Universitetinin III kurs tələbəsi Duyğu İslamova tərəfindən “Kosmonavtikanın tarixi və inkişaf yolu” mövzusunda çıxış edilib. Məruzədə kosmonavtikanın formalaşma mərhələləri, ilk kosmik uçuşlar və bu sahədə əldə olunan mühüm nailiyyətlər geniş şəkildə təhlil olunub.
Ardınca ŞAR-ın Gənc Alim və Mütəxəssislər Şurasının sədri Samirə Rəhimli və Sumqayıt Dövlət Universitetinin III kurs tələbəsi Həsən Hidayətov “Müasir kosmik missiyalar və onların məqsədi” mövzusunda təqdimatla çıxış edərək hazırda həyata keçirilən beynəlxalq kosmik proqramlar, planetar tədqiqatlar, peyk texnologiyaları və onların elmi-praktiki əhəmiyyəti barədə ətraflı məlumat veriblər.
Daha sonra ŞAR-ın Gənc Alim və Mütəxəssislər Şurasının sədr müavini Aytac İskəndərova və Sumqayıt Dövlət Universitetinin III kurs tələbəsi Təhminə Həsənova tərəfindən “Kosmosda həyatın mümkünlüyü və astrobioloji araşdırmalar” mövzusunda məruzə təqdim olunub. Məruzədə kainatda həyatın yaranma ehtimalı, yaşayışa yararlı zonalar, ekstremofil orqanizmlər və bu istiqamətdə aparılan müasir elmi tədqiqatlar haqqında geniş məlumat verilib.
Tədbirin rəsmi hissəsi “Kainata Doğru” adlı elmi-populyar filmin nümayişi ilə davam etdirilib. Film vasitəsilə iştirakçılar kosmosun dərinlikləri, kainatın quruluşu və müasir kosmik tədqiqatların nəticələri ilə daha yaxından tanış olmaq imkanı əldə ediblər.
© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.
