Aprel ayının 8-də Azərbaycan Respublikası Elm və Təhsil Nazirliyi N.Tusi adına Şamaxı Astrofizika Rəsədxanasında (ŞAR) növbəti astroseminar keçirilib.

Seminara rəhbərlik edən ŞAR-ın baş direktoru, AMEA-nın müxbir üzvü Namiq Cəlilov iştirakçıları salamlayıb və onlara məruzənin mövzusu haqqında məlumat verib.

Sonra rəsədxananın icraçı direktoru, professor Nəriman İsmayılov “Ulduz spektral xətlərində şüalanma komponentinin ayrılması metodu” mövzusunda məruzə ilə çıxış edib.

Təqdim olunan işdə Şamaxı Astrofizika Rəsədxanasında (ShAO) alınmış yüksək ayırdetməli ulduz spektroqramlarında ulduz örtüyünə məxsus şüalanma komponentlərinin ulduz fotosfer xətlərindən ayrılması metodu təsvir edilib. Məruzəçi bildirib ki, sözügedən metodun tətbiqi ilə spektral xətlərdə şüalanma komponenti olan ulduzların ulduzətrafı örtüyündə qaz-toz disklərində alınmış şüalanma payını fotosfer şüalanmasından ayırmaq mümkündür. 

Seminar iştirakçılarının böyük marağına səbəb olan çıxışın sonunda mövzu ətrafında geniş müzakirə aparılıb, onları maraqlandıran suallar məruzəçi tərəfindən cavablandırılıb.

© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.