Mart ayının 5-də Bakı Ali Neft Məktəbində “Sabahın alimləri” XV Respublika layihə müsabiqəsinin mükafatlandırma mərasimi keçirilib.
16 qızıl, 35 gümüş, 56 bürünc medal olmaqla ümumilikdə 107 medalın təqdim edildiyi mükafatlandırma mərasimində "Neyrokey" layihəsinin komanda üzvləri Məmmədova Röya (20 Nömrəli Məktəb-Lisey) və Səfərli Ayan (Fizika, riyaziyyat və informatika təmayüllü lisey) bürünc medal qazanıblar. Onu da vurğulamaq lazımdır ki, Azərbaycan Respublikası Elm və Təhsil Nazirliyi Nəsirəddin Tusi adına Şamaxı Astrofizika Rəsədxanasının "Qalaktikalar və ulduz əmələgəlmə prosesləri" şöbəsinin aparıcı elmi işçisi, astronomiya üzrə fəlsəfə doktoru, dosent Həmayil Adıgözəlzadə "Neyrokey" layihəsində məsləhətçi alim olaraq fəaliyyət göstərərək layihənin elmi konsepsiyasının formalaşdırılması, tədqiqat istiqamətinin müəyyənləşdirilməsi və nəticələrin elmi əsaslandırılması prosesində komanda üzvlərinə dəstək verib.
Qeyd edək ki, "Sabahın alimləri" müsabiqəsi Azərbaycan Respublikası Elm və Təhsil Nazirliyi, Məktəbəqədər və Ümumi Təhsil üzrə Dövlət Agentliyi, Təhsil İnstitutu, Elm və Təhsil İşçiləri Həmkarlar İttifaqı Respublika Komitəsinin təşkilatçılığı və tərəfdaşlığı ilə keçirilib.
Müsabiqənin əsas məqsədi ölkəmizdə fəaliyyət göstərən ümumi təhsil müəssisələrinin IX-XI siniflərində təhsil alan şagirdlərin elmi axtarışlara sövq edilməsi, onların elmi və yaradıcılıq fəaliyyətinin stimullaşdırılması çərçivəsində 9 istiqamət (riyaziyyat, fizika və astronomiya, kimya, biologiya, tibb və sağlamlıq, ekologiya və ətraf mühitin idarə olunması, mühəndislik, kompüter elmləri, robototexnika və süni intellekt) üzrə elmi tədqiqat işinə meyli olan istedadlı şagirdlərin aşkar olunmasıdır.
© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.
