5 mart 2026-cı il tarixində Beynəlxalq Astronomiya İttifaqının (International Astronomical Union) “The Women and Girls in Astronomy” təşəbbüsü çərçivəsində “Qadın və Elm: Güc, Zəka və Zəriflik” adlı elmi-populyar tədbir keçirilib. Tədbir Azərbaycan Respublikası Elm və Təhsil Nazirliyinin Nəsirəddin Tusi adına Şamaxı Astrofizika Rəsədxanasının (ŞAR) təşkilatçılığı ilə Sumqayıt Dövlət Universitetində baş tutub.
Təşəbbüsün məqsədi qadınların elmdə rolunun təşviqi, gənc qızların elm və tədqiqat sahələrinə marağının artırılması, həmçinin onların elmi potensialının dəstəklənməsi olub.
Tədbirin rəsmi hissəsi aparıcının iştirakçıları salamlaması ilə başlayıb. Açılışda qeyd olunub ki, müasir dövrdə qadınların elmə verdiyi töhfələr getdikcə artır və onların müxtəlif elmi sahələrdə fəaliyyəti cəmiyyətin inkişafına mühüm təsir göstərir.
Proqram çərçivəsində universitetin Təbiət elmləri fakültəsinin Fizika kafedrasının müdiri, dosent Gülnarə Quliyeva “Elmdə qadınların rolu və innovativ inkişaf perspektivləri” mövzusunda çıxış edərək qadın alimlərin elmi tədqiqatlara verdiyi töhfələrdən, eləcə də elmin inkişafında qadınların rolunun gücləndirilməsinin vacibliyindən danışıb.
Daha sonra “Kosmologiyada qadının rolu” adlı video-çarx nümayiş etdirilib. Video-çarxda müxtəlif dövrlərdə elmə mühüm töhfələr vermiş qadın alimlərin fəaliyyəti və onların elmi nailiyyətləri haqqında məlumat təqdim olunub.
Tədbirdə həmçinin ŞAR-ın elmi işçisi Ülviyyə Bəşirova “Elm və təhsildə qızların inteqrasiyası: müasir çağırışlar və imkanlar” mövzusunda məruzə ilə çıxış edib. O, qızların STEM sahələrinə cəlb olunmasının əhəmiyyəti, bu istiqamətdə mövcud imkanlar və gələcək perspektivlər barədə fikirlərini bölüşüb.
ŞAR-ın Gənc Alim və Mütəxəssislər Şurasının sədri Samirə Rəhimli isə “Gənc qızların elmi potensialının reallaşdırılması: təhsil və tədqiqat mühiti” mövzusunda çıxış edərək gənclərin elmi fəaliyyətə cəlb olunmasının vacibliyindən, elmi mühitin formalaşdırılmasında mentorluğun rolundan və gənc qızların elmə marağının artırılması istiqamətində həyata keçirilən təşəbbüslərdən bəhs edib.
Tədbirin sonunda iştirakçılar tərəfindən könüllü çıxışlar səsləndirilib, elmdə qadınların rolunun gücləndirilməsi və gənc nəslin bu sahəyə təşviqi ilə bağlı fikir mübadiləsi aparılıb.
Tədbir iştirakçılar tərəfindən böyük maraqla qarşılanıb və qadınların elmi fəaliyyətə cəlb olunmasının təşviqi baxımından mühüm platforma kimi qiymətləndirilib.
© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.
