25 aprel 2018–ci il tarixində AMEA N.Tusi adına Şamaxı Astrofizika Rəsədxanasının (ŞAR) Bakı bölməsində növbəti astroseminar keçirilib.
Tədbiri giriş sözü ilə açan Şamaxı Astrofizika Rəsədxanasının elmi işlər üzrə direktor müavini, f.r.ü.f.d Elçin Babayev astroseminar haqqında seminar iştirakçılarına məlumat verib.
Sonra ŞAR-ın “Ulduz atmosferləri fizikası və maqnetizm“şöbəsinin müdiri, f.r.ü.f.d.,dos. Canməmməd Rüstəmov “Volf-Raye fenomeni haqqında”mövzusunda (C.Rüstəmov, A.Abdulkərimova) icmal məruzəni təqdim edib. Məruzəçi Volf-Raye tipli ulduzlarının kəşf edildiyi tarixdən (1867-ci il) bu günə kimi spectral, fotometrik və digər üsullarla bu ulduzların müşahidələrdən aşkarlanmış xüsusiyyətləri barədə, bu ulduzların əmələ gəlməsi və təkamül yolları haqqında, onların tədqiqinin aktuallığ və Şamaxı Astrofizika Rəsədxanasında bu ulduzların tədqiqi nəticəsində alınmış nəticələr barədə geniş məlumat verib.
C.Rüstəmov qeyd edib ki, Volf-Raye ulduzları güclü maddə itkisinə məruz qaldığı üçün qalaktikanı ağır kimyəvi elementlərlə zənginləşdirir. Bu isə qalaktikada sonrakı ulduzəmələgəlmə prosesində mühüm rol oynayır: "Müasir astrofizikanın ən maraqlı obyektləri olan neytron ulduzları və qara dəliklər Volf-Raye tipli ulduzların təkamülünün son mərhələsində əmələ gəlir. Ona görə də bu ulduzların tədqiqi mühüm əhəmiyyət kəsb edir".
© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.
