Tədbiri ŞAR GAMŞ-ın sədr müavini Aysel İskəndərova giriş sözü ilə açaraq, iştirakçıları salamlayıb və onlara məruzənin mövzusu haqqında məlumat verib.

Sonra Azərbaycan Dövlət Neft və Sənaye Universitetinin əməkdaşı, fizika üzrə fəlsəfə doktoru, dosent Sevda Rzayeva "AI dəstəyi ilə görünən işıq spektrinin real vaxt rejimində vizuallaşdırılması" mövzusunda məruzə ilə çıxış edib. 

Təqdim olunan iş çərçivəsində görünən işıq spektrinin (380–780 nm) real vaxt rejimində vizualizasiyası üçün süni intellekt texnologiyalarına əsaslanan interaktiv qrafik istifadəçi interfeysi hazırlanmışdır. Python proqramlaşdırma dili əsasında yaradılmış bu tətbiq, istifadəçi tərəfindən daxil edilən dalğa uzunluqlarını müvafiq rəng kodlarına (RGB və HEX), tezlik dəyərlərinə və spektral bölgələrə çevirmək üçün istifadə edilmişdir. Rəngin ədədi ifadəsinin (RGB) təxmin edilməsi məqsədilə xətti reqressiya modeli, dalğa uzunluğuna əsasən işıq spektrinin rəng bölgəsinin müəyyən edilməsi üçün isə çoxkomponentli model sintezinə əsaslanan təsnifat alqoritmi – Random Forest tətbiq olunmuşdur. Bu yanaşma, ənənəvi fiziki modellərlə müqayisədə daha çox uyğunlaşma və təfsilat təqdim edir. Xüsusilə də kvant fizikası və optika sahələrində foton enerjisi, elektromaqnit dalğalarının tezlik-dalğa uzunluğu münasibəti və rəng algısı kimi (vizual qavrayış fenomeni kimi) anlayışların öyrədilməsində effektiv öyrənmə mühiti yaradır. Tədqiqat nəticələri göstərir ki, ənənəvi fiziki modellərlə süni intellekt metodlarının sintezi, vizual və interaktiv tədris platformalarının hazırlanmasında perspektivli nəticələr verir.

Seminar iştirakçılarının böyük marağına səbəb olan məruzənin yekununda mövzu ətrafında geniş müzakirə aparılıb, iştirakçıları maraqlandıran suallar cavablandırılıb.

© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.