Kosmik hava durumu – Hesabat dövrü ərzində Günəşin fəallığı artaraq 25-ci tsikl ərzində ən güclü alışmalardan biri qeydə alınmışdır. Bu 4274 oblastındakı X5.16 sinifli alışma olmuşdur. Alışmalara bağlı olaraq 10 sm diapazonda radioalışma, radio rabitədə R2-R3 səviyyəli fasilələr, II-IV tip radio emissiya və Yerə yönəlmiş Tac Kütlə Atılmaları (TKA) qeydə alınmışdır. Günəşin səthində ləkələrin sayı artaraq 8 ləkə qrupunda 131 ləkə və Tac Dəliyi müşahidə olunur.
Hesabat dövrü ərzində Günəşin fəallığının artması nəticəsində enerjisi 2 MeV-dən çox olan elektron seli də 10890 pfu-yadək, 10 MeV-dən çox enerji yüklü proton seli isə S1-S3 səviyyəli proton qasırğasınadək yüksəlmişdir. Günəş küləyinin maksimal sürəti 859 km/san–dək artmışdır. Yer orbitində planetlərarası maqnit sahəsinin maksimal qiyməti 24 nT, radial istiqamətdə isə -16 nT olmuşdur. Hal-hazırda Günəş küləyinin sürəti 458 km/san planetlərarası maqnit sahəsinin maksimal qiyməti 46.22 nT, radial istiqamətdə isə -9.95 nT təşkil edir.
Hesabat dövründə Günəşdə ardıcıl M və X sinif alışmaların baş verməsi nəticəsində 07-08 noyabr tarixlərində gözlənildiyi kimi G1-G3 səviyyəli geomaqnit qasırğası qeydə alınmışdır. 09 noyabrda baş verən X1.79 sinifli alışmaya bağlı TKA-nın gəlişi isə 11-12 noyabrda gözlənilirdi və bu gün sutkanın ilk saatlarından şiddətli geomaqnit (G4) qasırğası başlamışdır. Hal-hazırda Kp indeksinin göstəricisi 8-dir və geomaqnit qasırğası davam edir.
Kosmik hava proqnozu – Proqnoz günlərində (12-16 noyabr) C sinif alışmanın baş verməsi ehtimalı 99%, M (R1-R2) sinif alışmanın baş verməsi ehtimalı 85%, X (R3) sinif alışmanın baş verməsi ehtimalı isə 55% təşkil edir.
Enerjisi 2 MeV-dən çox olan elektron selinin və 10 MeV-dən çox enerji yüklü proton selinin də TKA-ın təsiri ilə yüksək səviyyələrdə olacağı gözlənilir.
Günəş küləyi sürəti də bir neçə 11 noyabrda baş vermiş TKA-nın da ardıcıl gəlməsi ilə 12-14 noyabrda yüksək tempdə qalacaq.
Avroraların müşahidə olunması ehtimalı isə yüksək geomaqnit enliklərdə 5-85%, orta geomaqnit enliklərdə isə 20-40%-dir.
Geomaqnit sahəsi – 09 noyabrda baş vermiş TKA-ın Yerə çatması ilə sutkanın ilk saatlarından şiddətli geomaqnit qasırğası başlamışdır. Dünən baş vermiş X5.16 sinifli alışmaya bağlı TKA-nın da bu gün və ya sabah sutkanın ilk saatlarında Yerə çatacağı gözlənilir. Onun təsirinin də əlavə olunması ilə şiddətli geomaqnit qasırğasının (G3-G4) davam edəcəyi, 14 noyabrda isə G1 səviyyəsinədək zəifləyəcəyi gözlənilir.
© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.
