Azərbaycan Respublikası Elm və Təhsil Nazirliyi Nəsirəddin Tusi adına Şamaxı Astrofizika Rəsədxanasında (ŞAR) 8 Noyabr – Zəfər Günü münasibətilə “Ədalətin Zəfəri: Suverenliyin bərpası, dayanıqlı sülhün təminatı” adlı tədbir keçirilib. Şamaxı Astrofizika Rəsədxanası və ŞAR Həmkarlar İttifaqı Təşkilatının birgə təşkilatçılığı ilə baş tutan tədbirdə rəsədxana əməkdaşları ilə yanaşı, Şamaxı Rayon İcra Hakimiyyəti və Yeni Azərbaycan Partiyası Şamaxı Rayon Təşkilatından rəsmi qonaqlar da iştirak edib.
Tədbirdən öncə Rəsədxana kollektivi Şamaxı şəhərində yerləşən Şəhidlər Xiyabanını ziyarət edib, Vətən uğrunda canından keçən qəhrəmanların xatirəsini ehtiramla yad edib, məzarları önünə tər çiçəklər qoyulub.
Rəsədxananın konfrans zalında davam edən tədbirdə əvvəlcə Azərbaycan Respublikasının Dövlət Himni səsləndirilib, daha sonra şəhidlərin əziz xatirəsi bir dəqiqəlik sükutla yad olunub.
Tədbiri giriş sözü ilə açan Şamaxı Astrofizika Rəsədxanasının baş direktoru, AMEA-nın müxbir üzvü Namiq Cəlilov çıxışında qeyd edib ki, 8 Noyabr – Zəfər Günü xalqımızın taleyində dönüş nöqtəsidir və bu tarixi hadisə Azərbaycan xalqının birliyi, inamı və Vətən sevgisinin təntənəsidir. O bildirib ki, Müzəffər Ali Baş Komandan cənab İlham Əliyevin rəhbərliyi ilə Azərbaycan Ordusu 30 ilə yaxın davam edən ədalətsizliyə son qoyaraq torpaqlarımızı işğaldan azad edib, suverenliyimizi bərpa edib və xalqımızın tarixi qürurunu özünə qaytarıb.
Namiq Cəlilov həmçinin vurğulayıb ki, Zəfər yalnız hərbi gücün deyil, həm də milli həmrəyliyin, elmin, təhsilin, informasiya mübarizəsinin və mənəvi dəyərlərin qələbəsidir. Onun sözlərinə görə, həmin dövrdə Şamaxı Astrofizika Rəsədxanasının kollektivi də öz sahəsində bu mübarizəyə dəstək verib — bəziləri birbaşa cəbhədə döyüşüb, digərləri isə informasiya cəbhəsində, elmi ictimaiyyət arasında həqiqətlərimizi dünyaya çatdırmaq istiqamətində fəaliyyət göstərib.
Rəsədxananın rəhbəri əlavə edib ki, bu gün artıq Zəfər ruhu ölkəmizin bütün inkişaf strategiyalarında öz əksini tapır, azad olunmuş torpaqlarda bərpa və quruculuq işləri dövlətimizin gücünü və xalqımızın iradəsini nümayiş etdirir.
Sonra çıxış edən Şamaxı Rayon İcra Hakimiyyətinin nümayəndəsi Rəşad Əliyev Zəfər Gününün siyasi əhəmiyyətinə toxunaraq vurğulayıb ki, Müzəffər Ali Baş Komandan cənab İlham Əliyevin rəhbərliyi ilə qazanılan bu tarixi qələbə ölkəmizin suverenliyinin və ərazi bütövlüyünün tam təmin olunması ilə nəticələnib. O əlavə edib ki, bu Zəfər Azərbaycan dövlətinin beynəlxalq arenada mövqeyini daha da möhkəmləndirib, regionda yeni reallıq formalaşdırıb. Bu gün isə həmin zəfərin məntiqi davamı kimi dayanıqlı sülh və inkişaf dövrü yaşanır.
Yeni Azərbaycan Partiyası Şamaxı Rayon Təşkilatının sədri Tural Qasımlı öz çıxışında bildirib ki, 8 Noyabr Zəfər Günü Azərbaycan xalqının tarixi ədaləti bərpa etdiyi, milli birliyini və siyasi iradəsini bütün dünyaya nümayiş etdirdiyi qürur günüdür. O qeyd edib ki, bu Qələbə xalqımızın həmrəyliyi, dövlətinə və ordusuna sarsılmaz inamı sayəsində mümkün olub.
Rəsədxananın icraçı direktoru, professor Nəriman İsmayılov isə Zəfər Gününün mənəvi tərəflərinə diqqət çəkib. O qeyd edib ki, bu Qələbə yalnız torpaqların azad olunması deyil, həm də xalqımızın mənəvi dirçəlişinin, milli kimliyinin və tarixi yaddaşının bərpası deməkdir.
Açılış nitqlərindən sonra tədbir iştirakçılarına “Sülhün səsi – gələcəyə baxış” adlı video-çarx nümayiş etdirilib.
Daha sonra öz işini məruzə çıxışları ilə davam etdirən tədbirdə ilk olaraq, rəsədxananın “Elmi əlaqələr və təşkilati məsələlər” şöbəsinin müdiri, fizika-riyaziyyat üzrə fəlsəfə doktoru, ehtiyatda olan polkovnik Kamal Hüseynov çıxış edərək qeyd edib ki, 44 günlük Vətən müharibəsində əldə olunan Qələbə təkcə cəsarətli ordumuzun deyil, həm də xalqımızın mənəvi birliyinin nəticəsidir. Kamal Hüseynov vurğulayıb ki, birinci Qarabağ müharibəsinin acı təcrübəsi gənc nəsildə Vətənə bağlılıq hissini daha da gücləndirib, bu da ikinci Qarabağ müharibəsində Zəfərin əsas ideoloji dayağına çevrilib.
Ardınca çıxış edən “Qalaktikalar və ulduzəmələgəlmə prosesləri” şöbəsinin müdiri, fizika-riyaziyyat üzrə fəlsəfə doktoru, dosent Nazim Hüseynov “Qarabağın dirçəlişi: İnfrastruktur və sosial-iqtisadi inkişaf” mövzusunda çıxışında bildirib ki, bu gün Azərbaycan dövləti azad edilmiş torpaqlarda böyük bərpa və quruculuq işləri aparır, müasir infrastruktur, yollar, enerji sistemləri və yaşayış məntəqələri inşa edilir. O bildirib ki, Qarabağ artıq təkcə Zəfərin simvolu deyil, həm də yenidənqurulan, çiçəklənən Azərbaycanın rəmzidir.
Son olaraq Vətən müharibəsi iştirakçısı Fuad Cəlilov “Müharibə meydanından Zəfər sabahına” mövzusunda çıxış edib. O, döyüş xatirələrindən söz açaraq, Azərbaycan əsgərinin ruh yüksəkliyindən, torpaq sevgisindən və qələbəyə olan inamından danışıb. Fuad Cəlilov qeyd edib ki, müharibə meydanında qazanılan zəfər bu gün sülhün, sabitliyin və inkişafın təminatına çevrilib, şəhidlərimizin qanı ilə yazılmış bu tarix gələcək nəsillər üçün ən böyük vətənpərvərlik məktəbidir.
Tədbirin sonunda Vətən müharibəsi iştirakçılarına Zəfər Günü münasibətilə xatirə hədiyyələri təqdim olunub.
© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.
