Azərbaycan Respublikası Elm və Təhsil Nazirliyi N.Tusi adına Şamaxı Astrofizika Rəsədxanasının (ŞAR) rəhbərliyi və ŞAR Həmkarlar İttifaqı Təşkilatının (HİT) təşkilatçılığı ilə ənənəvi olaraq Zəfər günü münasibətilə Şamaxı rayonunda yerləşən şəhid ailələrinə baş çəkilib və onlara yardım göstərilib.

Təşəbbüsün məqsədi, uzun illər düşmən tapdağı altında olan torpaqlarımızın azad edilməsi uğrunda aparılan döyüşlərdə şəhidlik zirvəsinə ucalan qəhrəmanlarımızın ailələrinə maddi və mənəvi dəstək olmaqdır.

Qeyd edək ki, ŞAR HİT nümayəndələri tərəfindən ziyarət edilən şəhid ailələrinə ərzaq yardımı təqdim edilib. Yardım paketləri ilə yanaşı, şəhidlərin ailə üzvləri ilə söhbət edilərək, Azərbaycanın şanlı Ordusunun qəhrəmanlıqla mübarizə apararaq, torpaqlarımızı düşmən işğalından azad etdiyi bir daha xatırladılıb. Vurğulanıb ki, şəhidlərimizin qanı sayəsində torpaqlarımız yenidən azad edilib və xalqımızın qüruru, rəşadətli Azərbaycan Ordusunun gücü ilə yüksəlib.

Bu cür tədbirlər, hər zaman olduğu kimi, Rəsədxana rəhbərliyinin və ŞAR HİT-in şəhidlərimizin ailələrinə olan ehtiram və dəstəyinin ifadəsidir. Şanlı Zəfərimizin memarı olan şəhidlərimizin xatirəsi qəlbimizdə əbədi yaşayacaqdır!

© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.